Tá sé deimhnithe ag an rialtas go mbeidh Corn Ryder á reáchtáil ar ghalfchúrsa an Adare Manor in iarthar Luimnigh sa bhliain 2026.
Is i nGaeilge a d’fhógair an Taoiseach an scéal agus é ag labhairt i nGleann Cholm Cille, áit a cruinniú rialtais ar siúl inniu.
“Tá an-áthas orm go mbeidh Corn Ryder 2026 á reáchtáil in Éirinn. Scéal iontach atá ann d’Éirinn, do chontae Luimnigh agus d’iarthar na hÉireann go háirithe,” a dúirt Leo Varadkar tráthnóna i nGaeltacht Dhún na nGall.
Ceann de na comórtais ghailf is mó ar domhan é Corn Ryder, mar a n-imríonn foirne na hEorpa agus Mheiriceá in aghaidh a chéile gach dara bliain.
Dúirt Varadkar go raibh an chomhaireacht sásta tacaíocht rialtais a chur ar fáil chun Corn Ryder a thabhairt ar ais go hÉirinn. Meastar go gcosnóidh an comórtas suas le €50 milliún ar an rialtas.
Is é JP McManus, ar leis an t-óstán Adare Manor, a íocfaidh as na costais a bhainfidh leis an ngalfchúrsa a réiteach ach an rialtas a íocfaidh as cúrsaí margaíochta, slándála agus infreastruchtúir.
Tuigtear go bhfuil seachbhóthar timpeall ar Áth Dara le tógáil mar chuid den phlean.
Tuairiscítear gur fiú idir €90 milliúin agus €160 milliún Corn Ryder d’eacnamaíocht na tíre.
Dúirt an tAire Spóirt Shane Ross gur cuireadh tús leis an bpleanáil chun an comórtas a tabhairt go hÉirinn mí Mheán Fómhair seo caite, nuair a bhí an comórtas ar siúl i bPáras.
Is é seo an dara huair ag an gcomórtas a bheith á reáchtáil in Éirinn, sa K Club i gCill Dara a bhí Corn Ryder ar siúl in 2006.