Cruinniú á lorg ag Conradh na Gaeilge le Státrúnaí nua an Tuaiscirt

Tá Conradh na Gaeilge ag iarraidh cruinniú le Státrúnaí nua Thuaisceart Éireann Julian Smith le plé a dhéanamh ar na féidearthachtaí a bhaineann le hacht Gaeilge a thabhairt isteach in Westminster.

Agus ceist an achta Gaeilge fós i measc na gconstaicí móra roimh athbhunú fheidhmeannas Stormont, dúirt Ard-Rúnaí Chonradh na Gaeilge Julian de Spáinn le Tuairisc.ie go raibh sé “an-tábhachtach” go gcuirfí ina luí ar Rialtas na Breataine gur féidir an reachtaíocht teanga a thabhairt isteach fríd Westminster.

“Dúirt Príomh-Aire na Breataine inné go raibh sé chun gach rud a dhéanamh a d’fhéadfadh sé a dhéanamh d’fhonn feidhmeannas Stormont a athbhunú. Má tá sé sin fíor agus má sheasann sé leis an méid a dúirt sé, tá sé de chumhacht aige acht Gaeilge a thabhairt isteach don Tuaisceart in Westminster.

“Is í an tosaíocht atá againne ná go dtiocfadh an reachtaíocht teanga fríd Stormont ach d’uireasa na rogha sin, tá muid ag iarraidh go n-achtófaí in Westminster í,” a dúirt de Spáinn.

Dúirt Ard-Rúnaí Chonradh na Gaeilge go raibh go leor le plé ag an eagraíocht teanga leis an Státrúnaí nua, ina measc cúlra an achta, ceist na comharthaíochta Gaeilge agus na cumhachtaí a bheadh ag aon choimisinéir teanga ó thuaidh.

“Nuair a bhuaileamar leis an iar-Státrúnaí Karen Bradley bhí go leor ceisteanna aici faoin acht Gaeilge agus shamhlóinn go mbeadh an cás amhlaidh le Julian Smith,” arsa de Spáinn.

Maidir leis na tuairiscí go raibh beirt choimisinéirí teanga agus coimisinéir ‘féiniúlachta’ á bplé mar chuid den réiteach ar an tsáinn pholaitiúil ó thuaidh, dúirt de Spáinn go raibh sé an-tábhachtach go gcinnteofaí go raibh “na cumhachtaí cuí” ag an gcoimisinéir Gaeilge.

“Caithfear a chinntiú nach mbeadh bac ar an gcoimisinéir tabhairt faoina chuid oibre. Níor cheart go mbeadh an coimisinéir i gcónaí ag fanacht le faomhadh ó oifig an Chéad-Aire agus an LeasChéad-Aire.

“Má tharlaíonn sin, ceist pholaitiúil a bheidh ann agus ní bheidh an coimisinéir in ann feidhmiú. Bheadh muid ag moladh go mbeadh an coimisinéir ag feidhmiú ar bhonn neamhspleách ar nós an choimisinéara teanga ó dheas,” a dúirt Ard-Rúnaí Chonradh na Gaeilge.