Mheall fógra ar Instagram mé maratón a dhéanamh
Dá gcuirfí ceist orm dhá bhliain ó shin, nó fiú bliain ó shin, an mbeadh spéis agam maratón, nó leathmharatón féin, a rith, déarfainn nach raibh spéis dá laghad agam ann.
Is minic a bhreathnaigh mé ar lucht reatha an Chonamaratóin nó maratón Bhaile Átha Cliath ag déanamh iontais go raibh na mílte daoine ann a bhí sásta páirt a ghlacadh a i rás a ainmníodh as éacht inar bhásaigh an chéad duine a rinne é.
Ach d’éirigh go han-mhaith le fógra Instagram de chuid Chumann Ailse na hÉireann agus mealladh go Maratón New York a bheidh á rith ag na mílte aimsir na Samhna. Tá breis agus €2,300 bailithe agam cheana féin ar son na carthanachta agus súil agam €6,000 a aimsiú faoi lá an rása féin.
Mar sin, seo anois mé amuigh faoin mbáisteach agus an dá bhonn ag bualadh bhóithre Ghleann Cholm Cille mar chuid de chlár traenála a d’aimsigh mé ar líne.
Ní déarfainn gur fear mór spóirt mé, cé go gcreidim go bhfuil mé réasúnta aclaí. Glacaim páirt i ‘rásanna eachtraíochta’ ar fud na hÉireann agus bainim taitneamh astu, ach ní hé go mbím ag traenáil lena n-aghaidh. Bíonn imeacht éigin ann chomh rialta sin gur geall le clár traenála é a bheith ag glacadh páirte i rás gach mí.
Ach ní airím ar an gcaoi chéanna faoin maratón. Tá idir eagla agus sceitimíní orm a bheith ag rith in éineacht le breis agus 50,000 duine eile trí chúig cheantar New York, agus bheartaigh mé nár leor an ‘aclaíocht folaigh’ atá ionam le mé a thabhairt trasna na líne.
Bainim úsáid as an aip aclaíochta Strava le cuntas a choinneáil ar mo thurais rothair agus bealaí fánaíochta. Is féidir leagan ‘gairmiúil’ de Strava a fháil a thugann mioneolas faoi do chuid aclaíochta féin agus, níos tábhachtaí domsa, plean traenála d’imeachtaí éagsúla, an maratón ina measc.
Murab ionann is go leor, bím sásta íoc as aip má fheicim go bhfuil feidhm agam leis, agus cheannaigh mé Strava Summit cúpla seachtain ó shin. Thosaigh an cúrsa traenála an tseachtain seo caite, agus is oth liom a admháil go bhfuil teipthe orm cheana féin cloí leis.
Ainneoin na ríomhphost a thagann isteach ag deireadh gach lae, níor éirigh liom gach cuid den chlár a chomhlíonadh mar gheall ar chúinsí éagsúla. Is féidir leithscéalta a dhéanamh ach beidh orm a bheith níos déine orm féin más maith liom an rás a chríochnú.
Is maith liom an clár atá ag Strava mar ní leagtar sprioc ciliméadair ach sprioc ama amach. Tráthnóna, mar shampla, beidh orm a bheith ag rith ar feadh 90 nóiméad, is cuma cé chomh fada is a thabharfaidh na cosa mé san achar sin ama.
Is fearr liom i bhfad sin ná a bheith ag iarraidh 10km a bhaint amach nó 15km a bhaint amach in achar áirithe ama. Is fear mór trom mé agus cé go bhfuil mé aclaí, níl mé sciobtha. Bainim córas seo an ama seachas córas an fhaid cuid den bhrú a chuirim orm féin agus mé amuigh ag rith.
Le cúnamh Dé, bainfidh mé na spriocanna ar fad amach an tseachtain seo.
Is féidir airgead a dheonú do Chumann Ailse na hÉireann anseo.
