Tá agóidí ar siúl sa Chatalóin i ndiaidh do Chúirt Uachtarach na Spáinne tréimhsí fada príosúin a ghearradh ar cheannairí de chuid an fheachtais ar son neamhspleáchas an cheantair sin.
D’iarr uachtarán na Catalóine Quim Torra ar dhaoine “mórléiriú easumhlaíochta sibhialta síochánta” a chur ar bun mar fhreagra ar bhreith na cúirte.
Níor glacadh leis an gcúis a cuireadh i gcoinne naonúr de na ceannairí go raibh siad páirteach in éirí amach foréigneach ach fuarthas ciontach iad i gcoireanna nach raibh chomh tromchúiseach.
Bhí baint ag na ceannairí le heagrú reifreann an neamhspleáchais in 2017. Gearradh pianbhreith idir naoi mbliana agus 13 bliain ar an naonúr as ceannairc. Níor gearradh aon phríosún ar thriúr eile a ciontaíodh as easumhlaíocht. Fíneáil a cuireadh orthu.
Shéan an 12 na cúiseanna go léir.
Go gairid i ndiaidh an bhreithiúnais eisíodh barántas gabhála i leith iar-uachtarán na Catalóine Carles Puigdemont atá ina chónaí thar lear.
Nuair a fógraíodh an bhreith thug lucht tacaíochta neamhspleáchas na Catalóine aghaidh ar na sráideanna in Barcelona, mar a ndearna siad agóid faoin gcinneadh. Bhí agóid chomh maith i bpríomh-chríochfort aerfort Barcelona mar a ndearnadh iarracht bac a chur ar bun.
Dúirt uachtarán na Catalóine Quim Torra gur chóir pardún a thabhairt do na ceannairí agus mhaígh sé nach gcuirfeadh a gciontú é féin ná a réimeas dá mbuille agus iad ar thóir an neamhspleáchais. “Ní bhfaighidh an cur faoi chois an ceann is fearr go deo ar an gcaint, an daonlathas agus an ceart féinchinntiúcháin,” a dúirt uachtarán na Catalóine.
Dúirt Aire Gnóthaí eachtracha na Spáinne Josep Borrell gur amhlaidh go leigheasfadh an bhreith an scoilt mhór i sochaí na Catalóine ar bhealach a léireodh “meas iomlán ar bhunreacht na Spáinne”.
I measc na ndaoine a ciontaíodh bhí iar-leasuachtarán an cheantair Oriol Junqueras ar cuireadh 13 bliain príosúin air as ceannairc agus mí-úsáid airgid phoiblí. Cuireadh cosc orthu aon phost rialtais a bheith acu go ceann 13 bliain.
Cuireadh 12 bliain príosúin ar iar-aire gnóthaí eachtracha na Catalóine Raül Romeva agus an t-iar-aire saothair Dolors Bassa agus urlabhraí an rialtais. Cuireadh cosc orthu aon phost rialtais a bheith acu go ceann 12 bliain.
Cuireadh príosún 11 bliain go leith Carme Forcadell, iarspéicéir de chuid pharlaimint na Catalóine agus cuireadh 10 mbliana go leith ar bheirt iar-airí eile, Joaquim Forn agus Josep Rull. Feachtasóirí aitheanta ar son an neamhspleáchais ab ea an cúigear eile a ciontaíodh.
