Fuair ceannaire Fhianna Fáil Micheál Martin beannacht a pháirtí parlaiminte inniu dul chun cainte le gach páirtí seachas Sinn Féin maidir le bunú comhrialtais.
Thug ceannaire Fhianna Fáil le fios do bhaill a pháirtí parlaiminte tráthnóna nach rachadh sé siar ar a gheallúint maidir le gan dul i isteach i gcomhrialtas le Sinn Féin.
Dúirt an Teachta Dála Niall Collins i ndiaidh an chruinnithe go raibh an páirtí aontaithe mar gheall ar an gcur chuige sin.
Tuairiscítear nár chuir aon duine ag an gcruinniú i gcoinne Martin a rinne cáineadh géar ar Shinn Féin.
Bhí a gcéad chruinniú ón olltoghchán inniu ag páirtí parlaiminte Fhianna Fáil, mar ar pléadh toradh an toghcháin, inar chaill siad seacht suíocháin, agus cad ba chóir don pháirtí a dhéanamh anois.
Níos túisce inniu thug ceannaire Shinn Féin Mary Lou McDonald dúshlán cheannaire Fhianna Fáil nuair a dúirt sí gurbh ionann comhrialtas idir Fianna Fáil agus Fine Gael agus “sonc san aghaidh” don phobal.
Dheimhnigh McDonald gur chuir sí litir chuig ceannaire Fhianna Fáil aréir ag lorg cruinniú leis chun ceisteanna a bhaineann le bunú rialtais a phlé
Dúirt sí inniu gur chóir d’Fhianna Fáil tacú leis an “rialtas ar son athraithe” atá á mholadh ag Sinn Féin.
“Dúshlán mór a bheidh ann dóibh tacú le clár rialtais den chineál sin ach deir Micheál Martin gur daonlathaí é, go mbíonn sé ag éisteacht leis an bpobal agus go bhfuil meas aige ar rogha an phobail agus mar sin tá a fhios aige gur athrú a theastaíonn ón bpobal,” arsa Mary Lou McDonald.
Dúirt Micheál Martin, ceannaire Fhianna Fáil, go minic nach rachadh sé i gcomhrialtas le Sinn Féin ná le Fine Gael, ach níor chuir sé a leithéid as an áireamh nuair a ceistíodh é lá an chomhairimh.
Bhí beirt óna bhinse tosaigh Jim O’Callaghan agus Michael McGrath níos diongbháilte faoi gan dul i mbun cainte le Sinn Féin, seasamh ar thacaigh baill eile den pháirtí leis le roinnt laethanta anuas. Dúirt Niall Collins, Pádraig O’Sullivan, Cathal Crowe, Cormac Devlin agus Niall Collins roimh chruinniú an lae inniu go rabhadar i gcoinne aon socrú a dhéanamh le Sinn Féin agus nach raibh aon mhandáid acu a leithéid a dhéanamh.
Dúirt an Teachta Dála as Luimneach Willie O’Dea gurb amhlaidh go mb’fhearr leis a bheith i rialtas le Donald Trump nó Vladimir Putin ná Sinn Féin.
Cuireadh tús inné le cainteanna maidir le bunú an chéad rialtais eile, ach ní raibh aon chainteanna fós ag na mórpháirtithe lena chéile.
