Líon na suíochán: 5
Cuóta mar % den vóta: 20%
Leagan Amach an dáilcheantair: Ag síneadh cois cósta ó Chluain Tarbh, trí Ráth Eanaigh, chomh fada ó thuaidh le Binn Éadair, Ard Aidhin, Darndál agus An Chúlóg ina lár.
Teachtaí Dála an 32ú Dála atá ag seasamh: Richard Bruton (FG), Denise Mitchell (SF) agus Seán Haughey (FF). Tá Tommy Broughan (NS) agus Finian McGrath (NS) ag éirí as
Staid na bpáirtithe in Olltoghchán 2016 agus i dtoghcháin áitiúla 2019 (Binn Éadair, Cluain Tarbh agus Ard Aidhin curtha le chéile)
| Páirtí | Olltoghchán 2016 (%) | Togh Áitiúla 2019 (%) |
|---|---|---|
| Fianna Fáil | 15.4 | 22 |
| Fine Gael | 19.7 | 17 |
| Lucht Oibre | 7.7 | 11 |
| Sinn Féin | 11.6 | 9 |
| C Glas | 1.4 | 11 |
| Clé | 29.3 | 16 |
| Eile | 14.9 | 14 |
Anailís: Seo ceann de na dáilcheantair is spéisiúla agus is deacra maidir le tuar a dhéanamh faoi. Bhíodh páirtí an Lucht Oibre an-láidir sa gceantar seo agus cé nach bhfuil aon suíochán ag an bpáirtí faoi láthair seans maith go mbeidh tar éis an toghcháin. Tá beirt neamhspleách ón eite chlé, a toghadh in 2016, ag éirí as; Tommy Broughan, a d’imigh ó Pháirtí an Lucht Oibre mar go ndeachaigh siad i gcomhrialtas le Fine Gael in 2011 agus Finian McGrath a bhí ina aire stáit sa rialtas deireanach. Fágann an bhearna atá fágtha ag an mbeirt acu deis ag an Seanadóir Aodhán Ó Ríordáin (LO) suíochán a fháil do Pháirtí an Lucht Oibre arís. Coinneoidh an tAire Richard Bruton (FG) a shuíochán gan stró ach is beag seans atá ag Fine Gael an dara suíochán a fháil. Níor chabhraigh sé leis an Seanadóir Catherine Noone (FG) gur labhair sí gan mórán discréide faoi cheannaire a páirtí, Leo Varadkar, agus í ag canbhasáil agus tuairisceoir ina teannta. Chomh maith leis sin, ní as an dáilcheantar seo í. Sheas sí i mBaile Átha Cliath Thiar in 2016, an dáilcheantar céanna le Leo Varadkar. Naoise Ó Muirí, iarmhéara ar Bhaile Átha Cliath arb as Cois Fharraige ó dhúchas dó, a sheas anseo in 2016 le Richard Bruton (FG) ach shocraigh Ardoifig Fhine Gael Catherine Noone a bhogadh ó dháilcheantar an Taoisigh go dáilcheantar Richard Bruton (FG).
Beidh suíochán amháin ag Seán Haughey (FF) nó ag an gComhairleoir Deirdre Heney (FF) agus dá roinnfidís an vóta eatarthu go cothrom d’fhéadfadh seans a bheith ag Fianna Fáil ar phéire a thabhairt leo. Rinne Haughey (FF) an-mhaith in 2016 nuair a tháinig sé sa dara háit, taobh thiar de Richard Bruton (FG), agus is dócha go dtógfaidh sé suíochán. Is iarrthóir maith í Deirdre Heney atá ag saothrú le píosa sa gceantar ar Chomhairle Cathrach Átha Cliath. Fuair sí 2,680 vóta i gceantar Chluain Tarbh sna toghcháin áitiúla. D’fhéadfadh sí a bheith san iomaíocht go deireadh.
Cé nach ndearna Sinn Féin go maith sna toghcháin áitiúla sa dáilcheantar seo, agus gan ach 9% den vóta acu, tá cóir na gaoithe leo sna pobalbhreitheanna agus ba cheart go gcabhróidh sin le Denise Mitchell (SF) a suíochán a choinneáil.
Fuair an Comhairleoir David Healy (CG) ón gComhaontas Glas 3,422 vóta sna toghcháin áitiúla anuraidh i gceantar Bhinn Éadair-Mullach Íde. Bhí 11% den vóta ag an gComhaontas Glas sna toghcháin áitiúla sa dáilcheantar. Ar an mbonn sin ba cheart go bhfaigheadh Healy (CG) suíochán.
Beidh troid spéisiúil ann don chúigiú suíochán idir Deirdre Heney (FF) agus triúr iarrthóirí ón eite chlé: Aodhán Ó Ríordáin (LO), Cian O’Callaghan (DS) a bhíodh tráth sa Lucht Oibre ach atá anois leis na Daonlathaigh Shóisialta agus John Lyons (NS), a bhíodh le Pobal Roimh Bhrabús ach a d’éirigh as roimh na toghcháin áitiúla anuraidh.
Má thoghtar David Healy (CG) beidh deacracht ag O’Callaghan (DS), a bhfuil a cheantar tacaíochta thart ar Bhinn Éadair chomh maith. Má chuirtear O’Callaghan (DS) as an áireamh ba cheart go rachadh an chuid is mó dá vótaí i dtreo Uí Ríordáin (LO). Chomh maith leis sin, ag glacadh leis go mbeidh Ó Ríordáin (LO) chun tosaigh ar Catherine Noone (FG), gheobhaidh sé slám maith vótaí aistrithe uaithi, má bhíonn Richard Bruton (FG) tofa faoin tráth sin. Ní bheidh mórán vótaí aistrithe le fáil ag DeirdreHeney (FF) ó cheachtar acu.
Ag seasamh mar iarrthóirí neamhspleácha tá Linda McEvoy (NS), Michael Burke (NS), Conor Creaven (NS), Brian Garrigan (NS) agus Sean O’Leary (NS). Tá Ben Gilroy (IFP) ag seasamh don Irish Freedom Party agus tá Proinsias Ó Conaráin (Aon) ag seasamh d’Aontú.
Tuar: Bruton (FG), Haughey (FF), Healy (CG), Mitchell (SF) agus Ó Riordáin (LO)
