Ní thuigeann leath den phobal gur chóir duit leithlisiú a dhéanamh ort féin má bhíonn comharthaí an fhliú orthu.
De réir turgnaimh a rinne Aonad um Thaighde Iompraíochta an ESRI thuig 88% de dhaoine gur chóir do dhuine atá buailte ag fiabhras nó casacht thirim fanacht glan ar dhaoine eile.
Ach níor thuig ach 49% de dhaoine gur chóir tú féin a leithlisiú chomh maith sa chás go mbíonn ceann de chomharthaí COVID-19 nach bhfuil chomh coitianta sin ort – scornach thinn, pianta colainne nó cráphianta.
Mar chuid den staidéar cuireadh cásanna éagsúla faoi bhráid daoine agus iarradh orthu a dtuairim a thabhairt faoi an dtiocfadh an féinleithlisiú i gceist sna cásanna sin.
Ba mhó daoine a dúirt gur chóir duit fanacht glan ar dhaoine eile sa chás nach raibh aon chomharthaí ort ach go raibh teagmháil agat le duine go raibh sé air, ná mar a dúirt gur chóir duit fanacht glan ar dhaoine má bhí siomptóim an fhliú ort.
De réir na comhairle sláinte phoiblí ba chóir d’aon duine a bhfuil comharthaí an fhliú air dul i mbun an fhéinleithlisithe, agus fanacht glan ar dhaoine eile.
“Beidh an féinleithlisiú fós ina chuid thábhachtach sa chath in aghaidh COVID-19 sna míonna amach romhainn agus ní foláir go dtuigfeadh daoine cén uair ba cheart dóibh é a dhéanamh,” arsa Pete Lunn, ceann an Aonaid um Thaighde Iompraíochta san ESRI.
Dúirt Lunn gur léirigh staidéar an ESRI go raibh “tuiscint mhaith” ag an bpobal ar an gcomhairle fad is a bhain sé le príomhshiomptóim an Covid-19 ach nach dtuigtear i gceart fós an chomhairle maidir le siomptóim eile.
Mhol lucht an staidéir bealaí éagsúla a bhféadfaí an teachtaireacht phoiblí a chur abhaile ar dhaoine.
Moladh léaráidí simplí agus grafaicí eolais chun an teachtaireacht a scaipeadh.
Deirtear go bhfuil aird á tabhairt anois ag an Roinn Sláine ar thorthaí an staidéir ina bhfeachtas eolais faoin gcoróinvíreas sna meáin shóisialta.
