Lasairfhíona Ní Chonaola beo ar líne agus imeachtaí baile eile
Lasairfhíona Ní Chonaola //Áras Éanna Beo, Déardaoin, 11 Meitheamh @ 21:00
Nár dheas a bheith in Inis Oírr, ag ithe béile i dTigh Ruairí agus ag siúl chomh fada le hÁras Éanna chun seó ealaíne de shórt éigin a fheiscint. Faraor, ní bheidh sé ar ár gcumas sin a dhéanamh go ceann tamaill, ach ní chuirfidh sé sin stop le himeachtaí an ionaid.
Tá beartaithe acu seisiún ar líne a bheith acu Déardaoin seo chugainn le bean na háite, Lasairfhíona Ní Chonaola. Amhránaí aoibhinn, a bhfuil stíl amhránaíochta sean-nóis Oileáin Árann le clos ar a halbaim An Raicín Álainn, Flame of Wine agus One Penny Portion. Bí ina teannta nuair a chuirfear físeán beo ar leathanach Facebook Áras Éanna.
Earth Cam
An bhfuil aon áit ar domhan gur mhaith leat a bheith anois díreach? Times Square? Paris na Fraince? Nó fiú Barra an Teampaill i lár chathair Átha Cliath? Más ea, ba cheart duit a bheith ar an eolas faoi Earth Cam. Is féidir leat cuairt a thabhairt ar áiteanna éagsúla timpeall an domhain, ach cuairt a thabhairt ar an suíomh seo. D’fhéadfá uaireanta an chloig a chaitheamh ag póirseáil agus ag féachaint ar láithreacha a bhíonn de ghnáth gnóthach, ach gach seans atá ciúin agus bánaithe faoi láthair!
Beyond the Breakwater le Catherine Foley
Is breá liom féin bheith ag éisteacht le podchraoltaí agus closleabhair chomh maith. Ní léitheoir ró-iontach mé agus is ar an mbonn sin go mb’fhearr liom na cluasáin a chur orm! Tá togra iontach idir lámha ag an scríbhneoir os na Déise, Catherine Foley, agus a deirfiúr Rose Ann i láthair na huaire. Tá taifid fhíse á dhéanamh acu de leabhar Catherine, Beyond the Breakwater. Is í Catherine í féin atá le clos á léamh agus suíomh éagsúil roghnaithe do gach caibidil! Cuirtear in airde iad ar a gcainéal YouTube agus is fiú go mór cuairt a thabhairt air.
Biongó Ghlór na nGael // gach Luan agus Céadaoin ar-líne, @ 19:00
Ní hamháin go mbíonn tráth na gceist teaghlaigh ar bun uair sa tseachtain ag lucht Ghlór na nGael, ach bíonn Biongó ar siúl chomh maith, gach Luan agus Céadaoin! Is ar Zoom a eagraítear a leithéid agus craoltar an cluiche beo ar leathanach Facebook na heagraíochta. Tá ceithre dhuais le bronnadh do gach cluiche, duaiseanna don líne, an colún, na ceithre chúinne agus an cárta lán!
Tá na treoracha ar fad gur gá duit a leanúint le clárú le fáil ar an leathanach Facebook atá ag Glór na nGael. Gach rath oraibh!
Comhrá Conallach, Facebook
Is fiú go mór féachaint ar na comhráití a eagraíonn Éamonn Ó Dónaill ar Facebook, sraith ar a dtugann sé Comhrá Conallach! Na haon Domhnach (beagnach, murach deacrachtaí teicniúla) cuireann sé aoi ó Dhún na nGall, nó a bhfuil ceangal acu leis an gcontae, faoi agallamh. Le cúpla seachtain anuas tá sé tar éis roinnt cainte a dhéanamh le Lillis Ó Laoire, Áine Ní Bhreisleáin, Ian Lee, Liam Ó Cuinneagáin agus Máire Ní Choilm, i measc eile. Déan cairdeas leis chun a leithéid a fheiscint, nó féachaint siar go deimhin, ar na comhráití go dtí seo!
