Tá cúrsaí an Covid-19 seasmhach i gcónaí, a dúradh ag preasocáid a bhí ag an bhFoireann Náisiúnta um Éigeandáil sa tSláinte Phoiblí tráthnóna.
Is i Luimneach is measa atá ráta scaipthe an ghalair sa stát le coicís anuas agus Dún na nGall an dara háit is measa atá buailte.
407 cás nua den Covid-19 a d’fhógair an Roinn Sláinte tráthnóna. 93 othar Covid-19 a bhí sna hospidéil agus 34 díobhsan a bhí in aonad dianchúraim.
Dúirt an víreolaí an Dr Cillian de Gascun, Stiúrthóir na Seirbhíse Náisiúnta maidir le Víris, tráthnóna go raibh 115 cás deimhnithe go nuige seo den chineál den víreas a dtugtar cineál na hIndia/Delta air.
Bhí líon na gcásanna den chineál sin seasmhach go maith sa mhéid is go raibh ráta fáis líon na gcásanna ag laghdú. Bhíothas sásta, a dúirt an Dr de Gascun, nach raibh cineál na hIndia/Delta den víreas ag scaipeadh níos mó i ngan fhios do na húdaráis.
Dúirt sé gur ‘faoiseamh áirithe’ é nach bhfuil cineál na hIndia den ghalar ag scaipeadh chomh tréan anseo is a tharla i Sasana.
Chaithfí a bheith aireach, áfach, a dúirt an Dr de Gascun.
733 cás den ghalar a deimhníodh i Luimneach le coicís anuas agus 376 cás in aghaidh gach 100,000 duine an ráta coicíse a bhí ann.
201 an ráta coicíse a bhí i gceist le Dún na nGall i gcomparáid le 172 in Uíbh Fhailí, an tríú contae is measa ó thaobh scaipeadh an ghalair agus 155 i mBaile Átha Cliath atá sa cheathrú háit.
Dúirt an tOllamh Philip Nolan, Cathaoirleach Choiste Comhairleach Samhaltaithe Eipidéimeolaíochta NPHET go raibh cúrsaí seasmhach go maith ar an mórgóir. Ar an meán, 420 cás in aghaidh an lae atá á ndeimhniú anois. Níos lú ná céad duine atá buailte ag an ngalar atá sna hospidéil agus tá an líon acusan atá sna haonaid dianchúraim “seasmhach”.
Idir 0.9 agus 1.05 atá ráta atáirgthe an ghalair, tá líon na gcásanna laethúla le cúig lá anuas níos lú ná 400 ar an meán den chéad uair le fada.
Chonacthas ardú suntasach, áfach, i líon na gcásanna i measc daoine idir 19-24.
Chosain an Príomhoifigeach Leighis an Dr Tony Holohan an cáineadh a rinne sé ar ghrúpaí daoine óga a bhailigh le chéile i mBaile Átha Cliath ag an deireadh seachtaine. Dúirt sé gurb amhlaidh gur theastaigh uaidh aird a tharraingt ar iompar a bhí ina údar imní ó thaobh na sláinte poiblí agus gur bhain an méid a chonaic sé féin siar as.
“Sílim dá gcromfadh an Chomhairle ar imeacht taobh amuigh a eagrú ní fhéadfaidís níos mó daoine a bhrú isteach san áit chúng sin,” arsa an Dr Holohan.
D’fhógair Roinn Sláinte Thuaisceart Éireann inniu nach raibh aon duine eile básaithe ansin de dheasca an víris. 84 cás nua a deimhníodh.
17 othar Covid-19 atá in ospidéil an Tuaiscirt agus tá beirt acusan in aonad dianchúraim.
Tá an chéad dáileog den vacsaín faighte ag 1,053,150 duine sa Tuaisceart agus tá an dara dáileog faighte ag 666,957.
Tá cead oscailte ag tithe lóistín agus óstáin inniu, ach ag a n-aíonna féin amháin a bheidh seirbhís ar bith le fáil iontu.
An tseachtain tá cead ag daoine idir 40 agus 44 bliain d’aois clárú do vacsaín in aghaidh an Covid-19. Is féidir le daoine atá 44 bliain d’aois clárú ón lá inniu agus amárach iadsan atá 43. Dé hAoine a bheidh daoine atá 42 ag clárú, 41 Dé Sathairn agus dream an dá scór ar an Domhnach.
Ar a laghad 7,090 duine atá básaithe in Éirinn go dtí seo de dheasca na paindéime, 2,153 duine ó thuaidh den teorainn agus 4,937 duine ó dheas di.
383,962 cás a deimhníodh go nuige seo in Éirinn, 261,147 cás ó dheas den teorainn agus 122,815 cás ó thuaidh di.
