Scaitheamh in Inis Meáin – treoir don turasóir
Fág slán le fadhbanna na mórthíre agus bígí ar an gcéad duine de do chairde chun eitilt trasatlantach a dhéanamh an samhradh seo, go hoileán geal mo chroí – Inis Meáin.
An t-oileán a bhfuil an daonra is lú ann as measc Oileán Árann, tá draíocht ar leith ag baint leis an oileán creagach nach bhfuil a shárú le fáil áit ar bith eile.
Ní haon ionadh gur mealladh scríbhneoirí mór le rá anseo i gcaitheamh na mblianta; WB Yeats, John Millington Synge, Martin McDonagh agus scríbhneoirí umhla NÓS san áireamh fiú! Bhainfeadh cúpla lá ar an oileán suaimhneach seo dúch ó pheann folamh.
Siúl, siúl, siúl a rún…
Beir leat do bróga nó buataisí don turas mar beidh tú ag brath go mór ar do chosa anseo. Tá roinnt lúbanna siúil ar fud an oileán ar fiú cúpla uair a chloig a chaitheamh orthu. An ceann is ansa liomsa ná Lúb Dhún Fearbhaí, a thabharfaidh ó Dhún Fearbhaí (ceann de dhá Dhún an oileáin) tú, amach chun na farraige agus ar ais arís. Bíodh do shúile oscailte d’fhéileacáin agus do choiníní agus bíodh spás i do bholg le haghaidh slisín cáca milis ó Catherine ag ‘Caifé Baile’ . Tiocfaidh tú chuig an gcaifé ar do bhealach ar ais agus i dteannta do cháca, gheobhaidh tú radharc breá ar Inis Oírr agus Aillte an Mhothair saor in aisce.
Seal sa Séipéal
I ndiaidh do shiúlóide, caith seal i Séipéal Mhuire Gan Smál ag breathnú ar fhuinneoga daite Harry Clarke. Tá patrúin na n-oileán le feiceáil sna fuinneoga agus móitífeanna na farraige go smior san ealaín. Gheobhaidh tú síocháin agus stair ar leith sa séipéilín seo, a tógadh sa bhliain 1939. Tógadh an teach pobail le clocha an tseanséipéil a bhí trasna an bhóthair agus ba é James Pearse, athair Phádraig Mhic Phiarais, a rinne an altóir.
An pionta is cúraí a bhlaisfiidh tú choíche
I ndiaidh do thurais ag an séipéal, bheadh sé ina pheaca mór gan cuairt a thabhairt ar Theach Ósta Inis Meáin, foirgneamh ríthábhachtach eile ar an oileán. Bíodh mála Tayto agat, dea-chomhrá agus an pionta Guinness is cúraí a bhlaisfidh tú choíche.
Cuir aithne ar mhuintir an oileáin
Pobal lách cairdiúil is ea pobal Inis Meáin, a chuirfidh fáilte is fiche romhat. Ach más sa tóir ar ghrianghrafanna don Insta grid atá tú, beidh ainmhithe an oileáin níos mó ná sásta teacht i gcabhair ort.
Bláthanna na Boirne
Ainneoin na farraige a scarann Oileáin Árainn ó chósta Chontae an Chláir, is cuid den Bhoireann í tírdhreach Inis Meáin. Neamh ar thalamh is ea é dá bhrí sin, don té a chuireann spéis sna bláthanna fiáine. Bígí ag faire amach do flúirse bláthanna i ngach aon dath agus méid, a lasfaidh cibé bóthar a thógfaidh tú.
‘Trasna na dTonnta’
Rachaidh radharcanna Inis Meáin chomh mór sin i bhfeidhm ort go mbeidh cuimhneachán deas uait le tabhairt abhaile leat. Níl áit ar bith is féiliúnaí don tasc áirithe sin ná ‘Trasna na dTonnta’; siopa lámhchéardaíochta in aice leis an tseanchéibh. Oibríonn bean an tí, Juda, i gcomhpháirt le ceardaithe agus cniotálaithe áitiúla chun earraí aoibhne lámhdhéanta a chur ar fáil. Níl aon dabht ach go n-aimseoidh tú seoid a thabharfaidh siar, siar i do chuimhne thú chuig an oileán draíochtúil seo.
_________________
Inis Meáin:
Taisteal
- Téann báid go hInis Meáin gach lá ó Dhúlainn, Co. an Chláir agus Ros an Mhíl, Co na Gaillimhe.
- Eitiltí ar fáil go laethúil ó Aer Árann, Co. na Gaillimhe.
Lóistín agus seirbhísí
- Tá liosta lóistín agus seirbhísí eile ar Inis Méain ar fáil anseo
