Ní bheidh an Breatimeacht ina chonstaic ar chonair an athmhuintearais in Éirinn, a deir Uachtarán Choimisiún an Aontais Eorpaigh Ursula von der Leyen sa Dáil.
“Ní féidir ligint do theorainn chrua ar oileán na hÉireann,” a dúirt Ursula von der Leyen ina haitheasc speisialta i dTithe an Oireachtais tráthnóna.
Dúirt sí go seasfadh an tAontas Eorpach i gcónaí le Comhaontú Aoine an Chéasta.
Bhí sí muiníneach, a dúirt sí, go dtiocfaí ar réiteach ar na ceisteanna “praiticiúla” a bhain le prótacal an Tuaiscirt.
Shuífeadh lucht an AE síos chun cainte “lenár gcairde” sa Bhreatain le “croí maith agus intinn oscailte”, tagairt, a dúirt sí, don bhanna The Saw Doctors agus a n-amhrán ‘To Win Just Once’.
Dúirt sí gur údar misnigh an plé a bhí aici go nuige seo le Príomh-Aire nua na Breataine, Rishi Sunak.
Dúirt sí go raibh cúis ag an AE féachaint “thar an tsreang dheilgneach”: chun an scoilt idir Tuaisceart agus Deisceart na hÉireann a leigheas.
Mhol Uachtarán Choimisiún an Aontais Eorpaigh go hard an méid, a dúirt sí, a bhí tugtha ag Éirinn don Aontas Eorpach.
Tá ómós ag an uile dhuine eile san Eoraip d’Éirinn, a dúirt sí.
“Rinne Éire áit níos fearr den Eoraip. Táimid faoi chomaoin agaibh,” a dúirt sí.
Ní ar mhaithe leis an AE a mholadh a bhí sí anseo, a dúirt sí ach chun buíochas a ghabháil le hÉirinn.
Chaithfeadh sí iarracht a dhéanamh Gaeilge a labhairt ó tharla gur teanga oifigiúil de chuid an AE í, ar sí,
“Go raibh maith agaibh,” a dúirt sí
Bhláthaigh an cumas a bhí in Éirinn nuair a bhain sí ballraíocht amach san AE agus tháinig claochlú ar an dtír dá bharr, arsa von der Leyen.
Ghabh sí buíochas le muintir na hÉireann as tacaíocht a léiriú do mhuintir na hÚcráine ó chuir an Rúis tús lena “gcogadh uafásach” sa tír sin.
Ghuigh von der Leyen gach rath ar Éirinn agus ar an AE ag deireadh a hóráide, a thuill bualadh bos mór fada ó na Teachtaí Dála agus na Seanadóirí a bhí i láthair don suí speisialta de dhá thigh an Oireachtais.
“Éire go brách! An tAontas Eorpach go brách!” a dúirt sí.
