‘Níl an dóchas céanna agam d’fhoireann na mban is a bhí d’fhoireann na bhfear’
Ceann de na rudaí is fearr faoin spórt gairmiúil ná nach bhfanann droch-chluiche leat. Níl an deis agat suí sa bhaile ag machnamh ar an gcluiche mar beidh ceann eile le himirt agat go luath agus tá ort díriú air sin.
Ag an am céanna, ceann de na rudaí is measa faoin spórt gairmiúil ná nach bhfaigheann tú deis machnamh a dhéanamh ach an oiread. Bhuaigh foireann na hÉireann an Chaithréim Mhór Dé Sathairn seo caite ach cúpla lá ina dhiaidh sin tá na himreoirí go léir ag tabhairt aghaidh ar an URC agus na comórtais Eorpacha.
Beidh Laighin ag imirt in aghaidh na Stormers agus, má bhuann siad, beidh siad sa bhaile do na chluichí ceathrúc ceannais, leathcheannais, agus an chraobh. Níl cluiche caillte acu go fóill i mbliana agus beidh siad ag iarraidh cur leis an iarracht sin sa bhaile an deireadh seachtaine seo.
Beidh Connachta sa bhaile in aghaidh Dhún Éideann. Tá Connachta san ochtú háit faoi láthair le 39 bpointe agus cé go bhfuil Dún Éideann sa dara háit déag, níl ach seacht bpointe eatarthu agus trí chluiche le himirt. Is dóigh go mbeidh ar fhoireann críochnú sa seachtú háit má theastaíonn áit i gCorn na Seaimpíní an bhliain seo chugainn uathu agus is dúshlán ollmhór é Connachta os comhair Dhún Éideann chun é sin a dhéanamh.
Beidh Glaschú ag taistil go Luimneach chun aghaidh a thabhairt ar an Mumhain agus is cluiche ollmhór é seo don chúige. Níl ach dhá phointe eatarthu faoi láthair (tá Glaschú sa cheathrú áit agus Mumha díreach fúthu) agus an dá fhoireann ag lorg cluiche baile sa bhabhta cheathrú ceannais. Tá an seacht gcluiche deirneach buaite ag Glaschú agus is cinnte gur cluiche fisiciúil a bheidh ann.
Tabharfaidh Ulaidh aghaidh ar na Bulls sa bhaile. Má bhuann Ulaidh agus Laighin, ní bheidh ach pointe amháin idir Ulaidh agus na Stormers atá sa dara háit faoi láthair. Mar a luaigh mé cheana, níl ach trí chluiche fágtha sa tsraith roimh na babhtaí ceannais agus mar sin is cluiche ollmhór é an cluiche seo d’Ulaidh.
Comórtas Sé Náisiúin na mBan
Beidh Comórtas Sé Náisiúin na mBan ag tosú inniu agus cé go raibh mé dóchasach go mbaineadh foireann na bhfear agus an fhoireann faoi 20 Caithréimí Móra amach, nílim chomh dóchasach sin agus mé ag caint faoi fhoireann na mban.
Tá go leor fós ag athrú don fhoireann seo, agus struchtúr nua fós á thabhairt isteach agus imreoirí óga ag fáil taithí ag an leibhéal seo. Má bhreathnaíonn tú ar Shasana, tá 1,219 caipín acu san fhoireann atá roghnaithe acu don chomórtas seo; níl ach 212 ag Éirinn. Mar a luaigh mé cheana, is foireann fhíor-óg í an fhoireann seo.
Má bhreathnaíonn tú ar amchlár na gcluichí, tá trí chluiche as baile ag Éirinn i mbliana agus cluiche baile le himirt idir gach ceann acu. Beidh an Fhrainc agus Sasana acu sa bhaile ach ní dóigh liom go ndéanfaidh buntáiste an bhaile mórán difríochta dóibh in aghaidh na bhfoirne sin.
Ar an iomlán, oireann an comórtas seo do Shasana. Fiú go bhfuil cluichí as baile acu (ar ndóigh) agus go bhfuil siad féin ag dul tríd athruithe móra, is í an Fhraince an cluiche deireanach atá acu agus an cluiche sin sa bhaile. Is buntáiste ollmhór é sin do Shasana; tá a fhios agam cé a gcuirfinn m’airgead air ar aon nós.
