Rogha an Lae
Rachaidh an ceann deireanach de na foirne móra chun páirce anocht agus an Phortaingéil, rogha go leor daoine chun an chraobh a bhuachan, le haghaidh a thabhairt ar Phoblacht na Seice i Leipzig.
Cé go mbíonn dóchas ann i gcónaí sa Phortaingéil go ndéanfaidh an fhoireann an beart, tá an-mhisneach ann i mbliana go bhfuil na himreoirí ann chun cúnamh a thabhairt do Cristiano Ronaldo agus teacht i gcomharbacht air más gá.
Cé gur bhuaigh an Phortaingéil EURO 2016 faoi cheannas an iarbhainisteora, Fernando Santos, bhí lucht tacaíochta na foirne éirithe bréan den stíl imeartha chosantach a bhíodh in úsáid aige faoin am gur chlis ar an bhfoireann sna babhtaí ceathrú ceannais ag Corn an Domhain 2022.
Ba mhian le daoine go dtabharfaí deis níos mó do na tosaithe iontacha atá ag an bPortaingéil dul i bhfeidhm ar chluichí agus tá sé sin déanta ag Roberto Martinez ó tháinig sé isteach. Bhuaigh an Phortaingéil gach ceann de na deich gcluiche cáilithe a bhí acu, an t-aon fhoireann ar éirigh leo an gaisce sin a dhéanamh, agus d’aimsigh siad 36 cúl sna cluichí sin, níos mó ná aon dream eile.
Níor ghéill an Phortaingéil ach dhá chúl ach an oiread, rud a léiríonn nach bhfuil dul ar an ionsaí amháin atá mar nós acu. Caithfear a rá, áfach, go raibh na foirne eile a bhí istigh leis an bPortaingéil sa ghrúpa cáilithe lag go maith agus tá ceist go fóill faoi chumas Martinez cluichí crua a bhuachan ag na comórtais mhóra. Bhí an Spáinneach i gceannas ar shárfhoireann na Beilge ar feadh sé bliana ach ba é an tríú háit a bhain siad amach ag Corn an Domhain sa Rúis buaicphointe na mblianta sin agus theip ar an mBeilg teacht slán óna ngrúpa i gCatar.
Cinnte beidh ceisteanna á gcur sa bPortaingéil má theipeann ar an bhfoireann Poblacht na Seice a shárú inniu ach, cé nach bhfuil siad chomh láidir le cuid de na foirne a tháinig rompu, ní foireann iontach lag í ceann seo na Seice.
Cúis mhór dóchais dóibh go bhfuil an tosach Patrik Schick, a d’aimsigh cúig chúl ag EURO 2020, ar fáil acu. Bhí Schick cráite ag gortuithe le dhá bhliain anuas ach má tá sé tagtha chuige féin, cuirfidh sé go mór le foireann na Seice. Is ó chiceanna cúinne agus ciceanna saora is mó a bheidh deis ag na Seicigh cúil a aimsiú. Tá Schick, imreoir West Ham Tomáš Souček, agus an cosantóir Ladislav Krejčí uile láidir san aer agus d’fhéadfadh siad deacrachtaí a chruthú don Phortaingéil ach ba cheart go mbeadh foireann Roberto Martinez sách maith chun teacht slán.
Cluichí
An Tuirc v An tSeoirsia – 5.00in (Grúpa F)
An Phortaingéil v Poblacht na Seice – 8.00in (Grúpa F)
