Tá bonn óir buaite ag Daniel Wiffen na hÉireann ag na cluichí Oilimpeacha i bPáras agus an chéad áit faighte aige sa chomórtas snámh saorstíle 800 méadar.
Thug an snámhaí 23 bliain d’aois as Machaire Lainne i gcontae Ard Mhacha sárthaispeántas sa snámh ceannais, go háirithe ag deireadh an ráis nuair a chuaigh sé chun tosaigh ar chách.
7:38.19 a thóg sé ar Wiffen an rás a bhuachan, an t-am is tapa fós ag aon chluichí Oilimpeacha.
Sa tríú háit a bhí sé tar éis 200 méadar agus bhí sé sa chéad áit faoin am go raibh 400 méadar bainte amach acu.
D’imigh Gregorio Paltrinieri chun cinn ar Wiffen agus iad ag déanamh ar cheann scríbe ach rinne fear na hÉireann teacht aniar iontach sa 150 méadar deireanach chun an bonn óir a fháil agus é chun cinn sa deireadh ar Bobby Finke Stáit Aontaithe Mheiriceá a thug leis an bonn airgid agus Gregoria Paltrinieri, na hIodáile a fuair an bonn cré-umha. Ag labhairt dó tar éis an ráis in Airéine La Défense, bhí ardmholadh ag Wiffen dá mhuintir.
“Ní fhéadfainn é a dhéanamh gan mo mhuintir. Ní raibh mé i m’aonar ansin amuigh. Bhí mé ag lorg Finke an t-am go léir, bhí mé ag féachaint sall ar Bobby Finke an t-am go léir ach ní raibh mé chun cailliúint sa 50 méadar deireanach sin. Bhí mé ag ullmhú dó sin an bhliain go léir…
“Tá gach rud buaite agam go dtí seo. Curadh an domhain, curadh na hEorpa agus na Cluichí Oilimpeacha. Anois is féidir liom a rá go bhfuilim i measc na ndaoine is fearr riamh.”
Seo an dara bonn ag foireann na hÉireann ag na cluichí Oilimpeacha.
Mona McSharry a bhuaigh an chéad bhonn d’Éirinn i bPáras aréir nuair a tháinig sí sa tríú háit sa bhabhta ceannais i snámh brollaigh 100 méadar na mban sa La Défense Arena.
