Tá an scannán dátheangach Kneecap roghnaithe ag IFTA le dul in iomaíocht ar son na hÉireann do na gradaim Oscar i mbliana.
Insíonn Kneecap scéal an bhanna rap aitheanta a bhunaigh triúr cainteoirí Gaeilge as an Tuaisceart.
Is é Kneecap rogha IFTA sa rannóg don scannán idirnáisiúnta is fearr agus beifear ag súil anois go n-éireoidh leis áit a bhaint amach ar an ngearrliosta d’ainmniúcháin na ngradam a bheidh ar siúl mí an Mhárta seo chugainn in Los Angeles.
Bhí an Ghaeilge i lár an aonaigh ag na gradaim chéanna anuraidh nuair a d’éirigh le An Cailín Ciúin ainmniúchán a fháil.
Seo an seachtú huair ar cuireadh scannán ina bhfuil an Ghaeilge sa treis ann chun cinn do na gradaim Oscar.
Tá ardmholadh tugtha ag léirmheastóirí do Kneecap ó bhí a première ag an scannán a stiúir Rich Peppiatt ag féile cháiliúil Sundance in Utah.
D’éirigh le Kneecap gradaim a bhuachan ag an bhféile sin agus ag Fleadh Scannán na Gaillimhe an samhradh seo.
Beidh an scannán le feiceáil i bpictiúrlanna na hÉireann ón Déardaoin seo chugainn, an 8 Lúnasa. Seoladh i bpictiúrlanna Stáit Aontaithe Mheiriceá inniu é.
Ar an 17 Nollaig a fhógrófar an gearrliosta d’ainmniúcháin Oscar sa rannóg don scannán idirnáisiúnta is fearr. Fógrófar na cúig scannán a ainmneofar don ghradam ar an 17 Eanáir 2025.
