Tá Glór na Móna ag troid in éadan na mianadóireachta san Amasóin
Tá sé beartaithe ag scaifte oibrithe óige is pobail ó Bhéal Feirste dul chun na hAmasóine le bualadh le bundúchasaigh an cheantair. Thug cuid de na bundúchasaigh cuairt ar Ghael-Ionad Mhic Goill, Glór na Móna, agus Fóram na nÓg le linn Féile na gCloigíní i mbliana.
Is féile bhliantúil í Féile na gCloigíní Gorma agus reáchtálann Glór na Móna, eagraíocht phobail agus óige in Iarthar Bhéal Feirste, imeachtaí a dhíríonn ar an mheabhairshláinte agus an fholláine i rith seachtain earraigh. Thairis sin, cuirtear béim shuntasach ar an timpeallacht i rith na féile agus na cloigíní gorma a fhásann ar an tSliabh Dhubh san earrach á n-úsáid acu lena hainmniú.
Beidh na taiscéalaithe ag súil le seal a chaitheamh sa dufair ag foghlaim faoi shaol agus faoi chultúr na mbundúchasach, agus tá siad ag saothrú airgid anois le haghaidh na gcostas taistil agus na hoibre atá ag dul i ngleic leis an scrios timpeallachta san Amasóin.
Labhair Eoghan Ó Conghaile, duine de na hoibrithe atá ag dul chun na hAmasóine, faoi bhunús an togra:
“Is oibrí óige mé le Cumann Óige Uachtar Chluanaí agus is printíseach mé le Fóram na nÓg le trí mhí anuas. Bím ag obair taobh le taobh le hEoghan Ó Garmaile ar an oideachas pholaitiúil agus nuair a tháinig scaifte ón dufair anseo d’Fhéile na gCloigíní Gorma, phléigh siad an scrios timpeallachta atá á dhéanamh ag corparáidí mianadóireachta ina gceantar.
“Labhair siad faoin nasc idir an timpeallacht agus an cultúr, agus má chaillfear an dufair, caillfear achan rud: teanga, cultúr, dídean. Tá achan rud nasctha leis an timpeallacht. Tharraing siad ar chosúlachtaí idir an dufair agus na cloigíní gorma ar an tSliabh Dhubh nach bhfuil mórán acu fágtha.”
I ndiaidh na féile, thuig foireann Glór na Móna go raibh neart le déanamh acu.
“Tá muid ag iarraidh a bheith ag foghlaim faoi shaol na ndaoine seo, faoin dóigh maireann siad, a gcuid bia, an cultúr agus an teanga. Anuas air sin go léir, ba mhaith linn lámh chuidithe agus giota airgid a thabhairt dóibh a chuideoidh leo in éadan na tochailte alúmanaim,” a dúirt Eoghan Ó Conghaile.
Tá GoFundMe cruthaithe ag Glór na Móna chun tuilleadh airgid a chur i dtreo an taistil agus na hoibre.
Ní hí an Bhrasaíl an t-aon tír a dtriallfar uirthi. Tá Fóram na nÓg, eagraíocht ionadaíoch réigiúnach a oibríonn le cumainn óige Ghaeilge fud fad na sé chontae, ag beartú dul chun na hIodáile, go Bostún, agus go Tír na mBascach ar chuairt staidéir.
Labhair Odhrán De Rúiséil, Oifigeach Ballraíochta agus Forbartha le Fóram na nÓg, faoi na turais taighde seo.
“Beidh mé féin agus cúpla comhghleacaí ag dul chun na hIodáile inár n-ionadaí ar son Fóram na nÓg agus ar son na hearnála óige Gaeilge fosta. Togra é seo atá dírithe ar an ilchultúrthacht agus éagsúlacht i dtaobh na hoibre óige.
“Tá an tÚdarás Oideachais ag reáchtáil turais go dtí an Tioról Theas, áit a bhfuil ilchineálacht faoi bhláth ó thaobh na teangeolaíochta de. Mhothaigh an tÚdarás go raibh sé fóirsteanach Fóram na nÓg a thabhairt leo ar an turas seo ionas go bhfoghlaimeoidh muid faoi na nósanna éagsúla atá ag grúpaí óige eile maidir le cur chun cinn teanga i measc na hoibre óige.”
The post Tá Glór na Móna ag troid in éadan na mianadóireachta san Amasóin appeared first on NÓS.
