Fágfar ar lár ón leagan Gaeilge de leabhar scoile mír chonspóideach a deirtear atá maslach agus frith-Éireannach.
Tá cáineadh déanta ar mhír sa leabhar scoile ‘Health and Wellbeing’ ina ndéantar comparáid idir ‘Family A’ agus ‘Family B’, comparáid ar ghabh na foilsitheoirí leithscéal as.
Tuairiscíodh gur fágadh ar lár sa leagan Gaeilge den leabhar an mhír chonspóideach, ach dheimhnigh na foilsitheoirí, Edco, do Tuairisc gurb amhlaidh nár aistríodh an leabhar Gaeilge go fóill.
Foilsíodh leagan nua Béarla den téacsleabhar OSPS (Oideachas Sóisialta, Pearsanta agus Sláinte) in 2023 ach tá scoileanna Gaeilge fós ag brath ar an gcéad eagrán den leabhar a foilsíodh in 2017. Níl an mhír chonspóideach sa leagan sin den leabhar.
Sa leagan nua den téacsleabhar OSPS, a bhíonn á úsáid ag daltaí i mbliain 1-3, cuirtear ‘Family A’ i láthair mar dhream a bhfuil suim acu sa cheol traidisiúnta agus i gCLG agus atá cúngaigeanta agus doicheallach roimh dhaoine a bhfuil creideamh eile acu.
Cuirtear ‘Family B’ i láthair mar chlann nua-aimseartha atá leathanaigeanta a bhfuil suim acu sa taisteal agus a bheith ag blaiseadh de rudaí nua éagsúla.
Ghabh foilsitheoirí an leabhair leithscéal as an mhír agus ghéill siad go raibh an cur chuige sa mhír lochtach. Ghlac siad leis go ngoillfeadh an mhír ar dhaoine agus go gcuirfeadh sé fearg orthu agus dúirt siad nach é sin an aidhm a bhí acu.
Dúirt siad go bhfaighfí réidh leis an mhír.
Dheimhnigh na foilsitheoirí do Tuairisc nach raibh an mhír sa leagan Gaeilge den leabhar agus nach mbeadh an mhír sin sa leagan Gaeilge nua nuair a d’aistreofaí é.
“Ba mhaith linn a dheimhniú nach bhfuil aon leagan Gaeilge d’eagrán 2023 de Health and Wellbeing 1 foilsithe againn.
“Foilsíodh an chéad eagrán den leabhar in 2017 agus bhí an t-eagrán sin ag teacht le sonraíocht an OSPS ag an am. Cuireadh aistriúchán Gaeilge d’eagrán sin 2017 ar fáil.
“Tugadh sonraíocht nua OSPS isteach in 2023, agus foilsíodh an uair sin leagan nua de Health and Wellbeing 1. Níor aistríodh go Gaeilge go fóill an t-eagrán 2023.”
