Tá cáineadh géar déanta ag an gnrúpa feachtais BÁNÚ ar an Aire Tithíochta faoin easpa soláthair do chúrsaí tithíochta sa Ghaeltacht i mBuiséad 2025.
Theastaigh ón mbrúghrúpa go gcuirfí soláthar €16 milliún ar fáil ach ní dhéanann an Buiséad tagairt ar bith do chúrsaí tithíochta sa Ghaeltacht.
Ag preasócáid rialtais an tseachtain seo, dúirt an tAire Tithíochta Darragh O’Brien go raibh sé ag iarraidh teacht ar réiteach na bhfadhbanna.
“Tuigim na fadhbanna, na fadhbanna tithíochta, fadhbanna uisce freisin agus fadhbanna pleanála agus tá mé ag déanamh mo dhíchill na ceisteanna sin a réiteach.”
“Táim ag obair freisin ar athrú sa dlí pleanála, le cabhair a thabhairt do na daoine atá ina gcónaitheoirí sa Ghaeltacht, go mbeidh siad ábalta tithíocht a fháil sa Ghaeltacht.”
Shéan an tAire O’Brien freisin go ndearna an Buiséad neamhaird ar éilimh ó eagraíochtaí pobail sa Ghaeltacht maidir le cúrsaí tithíochta.
Dúirt sé, “Ní aontaím leis sin. Bhuail mé le Bánú roimhe, phléamar fadhbanna tithíochta sa Ghaeltacht. Tá fadhbanna ann, táim cinnte faoi sin. Ach tá an dóchas ann freisin.
“Thug mé cead don chéad scéim tithíochta ar praghas réasúnta i gConamara Theas, i mBearna.”
Tharraing ráitis an Aire cáineadh ón mbrúghrúpa tithíochta BÁNÚ. Ag labhairt dó le Tuairisc, dúirt urlabhraí de chuid na heagraíochta, Donncha Ó hÉallaithe, “gur cuma leis an rialtas seo faoin ngéarchéim tithíochta agus faoin ngéarchéim teanga sa nGaeltacht“.
“Tá díomá orainn nach raibh rud ar bith sa mBuiséad a thabharfadh leide go bhfuil sé i gceist ag an rialtas seo acmhainní breise a chur ar fáil d’Údarás na Gaeltachta agus do Roinn na Gaeltachta mar a d’iarr BÁNÚ.
“Dá mba rud é go raibh siad dáiríre faoi fgadhbanna éagsúla a réiteach, bheadh scéimeanna fógartha acu sa mBuiséad seo.”
Rinne an tUasal Ó hÉallaithe cáineadh freisin ar an méid a bhí le rá ag an Aire faoin scéim inacmhainne tithíochta i mBearna.
“Ní do chainteoirí Gaeilge an scéim sin,” a dúirt ó hÉallaithe. “Ní shlánóidh sé sin an Ghaeltacht agus ní réiteoidh sé sin an géarchéim tithíochta atá ann.”
Tá tugtha le fios ag an Roinn Tithíochta nach mbeidh aon choinníoll teanga i gceist leis an bhforbairt sin i dTroscaigh Thoir i mBearna.
