Níl na daoine i dTuaisceart Ghaza ach “ag fanacht leis an mbás” tar éis trí seachtaine de bhuamáil Iosrael, a deir Philippe Lazzarini, Ardchoimisinéir Ghníomhaireacht na Náisiún Aontaithe um Fhóirithint agus Oibreacha ar mhaithe le Dídeanaithe Palaistíneacha [UNRWA].
“Tá líon na marbh ag méadú agus beagnach trí seachtaine caite ag Fórsaí Iosrael ag buamáil gan stad gan staonadh. Tá ár gcuid oibrithe ansin ag rá linn nach bhfuil teacht acu ar bhia, uisce ná cúram leighis. Tá boladh an bháis ar fud na háite mar go bhfuil na corpáin fágtha ina luí ansin ar na bóithre nó istigh faoin smionagar,” a dúirt Lazzarini.
Dúirt an tArdchoimisinéir gur diúltaíodh dá n-iarracht na corpáin a thabhairt chun bealaigh agus cúnamh daonnúil a chur ar fáil.
“I dTuaisceart Ghaza, níl na daoine ach ag fanacht leis an mbás. Braitheann siad go bhfuil siad tréigthe, iad ina n-aonar agus gan aon dóchas fágtha acu. Maireann siad ó uair an chloig amháin go ceann eile, agus scéin an bháis iontu gach aon nóiméad.”
Dúirt Lazzarini ó thosaigh an cogadh seo bliain ó shin gur fhan cuid d’fhoireann UNRWA i dtuaisceart Ghaza agus “go ndearna siad a ndícheall rud a bhí dodhéanta a dhéanamh agus cúnamh a thabhairt do dhaoine a bhí ina ndídeanaithe ina ndúiche féin”.
Choinnigh foireann UNRWA cuid de na hionaid dídine oscailte d’ainneoin na buamála agus ionsaithe géara ar a gcuid foirgneamh.
“Ar son ár gcuid oibrithe i dtuaisceart Ghaza, tá mé ag iarraidh sos comhraic láithreach bonn, fiú mura mbeadh ann ach cúpla uair an chloig, le cead imeachta daonnúil a thabhairt do theaghlaigh ar mian an áit sin a fhágáil agus dul go ceantar éigin atá níos sábháilte. Sin é an rud is lú ba chóir a dhéanamh chun beatha sibhialtach, nach bhfuil baint ná páirt acu leis an gcogadh seo, a shábháil.”
Bhí Anthony Blinken, Rúnaí Stáit na Stát Aontaithe, ar ais in Iosrael inniu agus é ag iarraidh bonn a chur arís faoin bpróiseas taidhleoireachta atá ó rath d’fhonn teacht ar shos comhraic idir Iosrael agus Hamas agus teacht ar réiteach faoina saorfaí na gialla.
Dheimhnigh aireacht sláinte na Liobáine inniu gur maraíodh 13 duine agus gur gortaíodh 54 eile in ionsaí buamála de chuid Iosrael i mBéiriút.
Dúirt Iosrael gur áiseanna de chuid Hezbollah an targaid a bhí acu san ionsaí ach dealraíonn sé gur buaileadh ceantar cónaithe trasna ó Ospidéal Ollscoile Rafik Hariri, an príomhospidéal poiblí i ndeisceart Bheiriút.
