Craolfar an tsraith drámaíochta Gàidhlig is costasaí riamh ar BBC Alba agus BBC Four “go luath” sa bhliain 2025. Is é an stiúrthóir Éireannach Tom Sullivan, a stiúir an scannán Gaeilge Arracht a stiúir an dráma nua coireachta. Tá na chéad ghrianghraif ó sheit an dráma An t-Eilean (An tOileán) chomh maith le liosta iomlán na n-aisteoirí ag an BBC.
Is í an t-aisteoir óg as Leòdhas Sorcha Groundsell (a bhí in His Dark Materials, Shetland, agus The Innocents) a bheidh sa bpríomhról sa dráma coireachta seo – an póilín Kat Crichton. Titeann an dráma amach i Leòdhas agus na Hearadh, oileán Gàidhealtachda in iarthar na hAlban nuair a mharaítear bean shaibhir, Mary Mclean.
Is í Kat Crichton agus an Bleachtaire Ard-Chigire Ahmed Halim (Sagar Radia) a fhiosraíonn dúnmharú na mná i gceithre chlár na sraithe nua. Ar na haisteoirí eile a bheidh sa dráma nua tá Iain Macrae, Elspeth Turner, Sinéad MacInnes, Andrew Macinnes, Meredith Brook, agus Sam James Smith.
Is é an comhlacht léiriúcháin Black Camel Pictures a rinne An t-Eilean don BBC. Scríobh Nicholas Osborne agus Patsi Mackenzie an script agus chosain an tsraith seo tuairim £1m punt (€1.2m) an eipeasóid. Rinneadh an chuid is mó den scannánaíocht i Leòdhas agus na Hearadh agus i nGlaschú.
Dúirt Sorcha Groundsell gur “cor cinniúnach” i ndán na Gàidhlig é léiriú an dráma nua teilifíse agus gur “pribhléid” a bhí ann páirt a bheith aici féin sa chlár.
“Shílfeá gur cor cinniúnach don Ghàidhlig é seo. Ar fud na cruinne tá teangacha dúchais ag teacht chun cinn go bródúil as an dorchadas agus ag fáil an aitheantais atá dlite dóibh. Breathnaím ar an gclár s’againne mar chuid den ghluaiseacht dhomhanda sin, is ceiliúradh é ar gach atá uathúil fúinn.
“Ba phribhléid agus údar lúcháire é a bheith ag obair ar An t-Eilean. Tá mé an-bhródúil go raibh baint agam le léiriú atá ag treabhadh na ngort nua seo don Ghàidhlig agus ag léiriú áilleacht, cruthaitheacht, agus doimhneacht ár dteanga don domhan mór,” a dúirt Groundsell.
