Tá Seirbhís Póilíneachta Thuaisceart Éireann [PSNI] i mbun fiosrúcháin faoi bhileoga frith-Ghaeilge a cuireadh ar fheithiclí taobh amuigh de rang Gaeilge i mBéal Feirste an tseachtain seo. Is mar “eachtra fuatha” atá scaipeadh na mbileog á fhiosrú, dar leis an PSNI.
Fágadh na bileoga A4 a raibh teachtaireacht chlóbhuailte fhrith-Ghaeilge orthu ar charranna na ndaltaí a bhí ag freastal ar an meánrang Gaeilge a bhíonn á reáchtáil saor in aisce i dteach tábhairne The Points mar a thugtar air, ar Bhóthar Bhaile Átha Cliath.
Dúradh ar na bileoga gur chóir go mbeadh “an ghráin ar an nGaeilge” ag 87% de mhuintir na hÉireann “agus gurb é an Béarla “máthairtheanga” mhuintir na hÉireann.
Maíodh gur tábhachtaí i bhfad d’oidhreacht na hÉireann “Caitliceachas na hÉireann” ná an Ghaeilge agus gur chóir don rialtas an Laidin a mhúineadh i scoileanna na tíre in áit na Gaeilge.
“Except for people from Galway and the west anyone from midland and eastern counties will find it very difficult to find any Irish language in their family background,” a dúradh ar an mbileog.
Tuairiscíodh gur fágadh na bileoga ar thuairim is cúig charr déag taobh amuigh den teach tábhairne a raibh an rang Gaeilge ar siúl ann. Bíonn dhá rang Gaeilge sa tseachtain ar siúl in ósta The Points – rang meánleibhéil ar an Luan agus rang bunleibhéil ar an Déardaoin.
Cháin an Comhairleoir Cathrach de chuid Alliance Emmet McDonough-Brown, fear a bhfuil Gaeilge aige féin, na bileoga agus dúirt gur údar díomá dó go ndéanfaí iarracht foghlaimeoirí teanga a scanrú.
“Is údar mór díomá é go ndéanfadh duine éigin iarracht foghlaimeoirí teanga atá ag cur lena gcuid eolais a scanrú. Is lenár bpobal an Ghaeilge, pobal a úsáideann í agus a bhfuil meas aige uirthi agus ba chóir go mbeadh daoine in ann í a fhoghlaim gan an amaidí ceart críochnaithe seo,” a dúirt sé.
Tá an PSNI ag iarraidh ar dhuine ar bith a bhfuil eolas acu faoin eachtra a dhul i dteagmháil leo agus dúirt gur “eachtra fuatha” a bhí ann.
