Dúirt an Taoiseach Micheál Martin go ndéarfadh sé leis an Uachtarán Trump ag a gcruinniú an tseachtain seo chugainn go dteastaíonn socrú síochána san Úcráin ón tír seo, síocháin a bheidh láidir agus inmharthana.
Dúirt an Taoiseach sa Dáil gur theastaigh socrú síochána san Úcráin ón Uachtarán Trump agus go raibh tuairimí éagsúla ann faoin mbealach leis an tsíocháin sin a bhaint amach.
Inniu dúirt comhairleoir slándála náisiúnta an Tí Bháin, Mike Waltz, go ndéanfadh an tUachtarán Trump a mhachnamh ar thacaíocht na Stát Aontaithe a chur ar fáil arís don Úcráin dá n-eagrófaí cainteanna síochána agus dá dtabharfaí faoi bhearta a spreagfadh iontaoibh.
“Sílim gur féidir linn na comhráite seo a shocrú agus a bheith réidh le tabhairt faoin idirbheartaíocht, agus dáiríre má chuirtear moltaí a chothódh iontaoibh ar an mbord, bheadh an tUachtarán sásta breathnú go grinn arís ar thacaíocht (don Úcráin),” a dúirt Waltz in agallamh le Fox News.
D’ordaigh Trump an sos ó thaobh tacaíochta inné tar éis cruinniú teasaí a bheith aige féin agus Uachtarán na hÚcráine Volodymyr Zelensky sa Teach Bán an tseachtain seo caite.
Idir an dá linn, d’fhógair stiúrthóir an CIA John Ratcliffe sos maidir le faisnéis a roinnt leis an Úcráin, rud a chuirfidh tuilleadh brú ar an Úcráin géilleadh do chur chuige Trump.
Agus an tUachtarán Trump ag tabhairt óráid i dTeach na Comhdhála aréir, an píosa cainte is faide a thug aon uachtarán riamh sa teach sin, dúirt sé go raibh an Úcráin réidh le tús a chur le cainteanna síochána agus léigh sé amach litir a bhí faighte aige féin ón Uachtarán Zelensky.
Dúirt sé go ndúirt an tUachtarán Zelensky gur theastaigh síocháin uaidh agus “deireadh a bheith leis an gcogadh faoi dheireadh agus faoi dheoidh”.
I bpostáil ar an meán sóisialta X, dúirt Zelensky gur labhair sé le Seansailéir na Gearmáine, Olaf Scholz, a bhfuil deireadh ag teacht lena thréimhse in oifig.
“Táimid ag brath ar aontas na hEorpa faoin Úcráin agus is chuige sin atáimid ag obair. Teastaíonn saol sábháilte uainn dár bpobail uile sa todhchaí,” a dúirt an tUachtarán Zelensky.
“Ní sos comhraic sealadach atá uainn ach deireadh leis an gcogadh faoi dheireadh is faoi dheoidh. Is féidir é sin a bhaint amach lenár n-iarrachtaí comhordaithe agus ceannaireacht na Stát Aontaithe.”
Dúirt Micheál Martin go bpléifeadh se cúrsaí eacnamaíochta leis an Uachtarán Trump freisin ag cruinniú na seachtaine seo chugainn.
“Tá eacnamaíocht na tíre seo beag agus oscailte agus muid ar son na saorthrádála agus beidh mé ag cur an dearcaidh sin ar a shúile don Uachtarán Trump,” a dúirt an Taoiseach.
Dúirt sé freisin go leagfadh sé béim air a thábhachtaí atá sé go ndaingneofaí an sos comhraic in Gaza.
