Is i bhfómhar na bliana seo a chuirfear tús leis an obair forbartha ar chéibh Inis Oírr agus súil ann go mbeidh sí réidh faoi lár 2027.
Tá Comhairle Chontae na Gaillimhe ag lorg innealtóirí chun tabhairt faoin togra €27 milliún agus síneadh 90m le cur leis an gcé, tonnchosc le tógáil agus dreideáil le déanamh.
Deir an chomhairle go bhfuil súil aici go dtosóidh an obair thógála ar an suíomh i bhfómhar na bliana seo. Bheadh briseadh san obair sa ngeimhreadh agus leanfadh an obair ar aghaidh in earrach, samhradh agus fómhar 2026 agus súil go mbeadh an obair chríochnaithe á déanamh in earrach agus samhradh 2027.
Tá Comhairle Chontae na Gaillimhe ag lorg tairiscintí ó fhoireann innealtóirí a bheadh freagrach as an obair ar an gcé, innealtóir sinsearach, innealtóir agus cléireach oibre san áireamh.
Beidh an fhoireann fsin reagrach as a chinntiú go bhfuil an obair á déanamh de réir mar atá leagtha síos sa gconradh.
Beidh an t-innealtóir sinsearach lonnaithe go lánaimseartha ar Inis Oírr ó mhí an Mheithimh i mbliana go dtí mí Iúil 2027, mar a bheidh an t-innealtóir eile seachas le linn an gheimhridh. Beidh costais mhaireachtála, taistil agus lóistín san áireamh sa bpá a bheidh le híoc lle baill nan foirne sin.
Tá coinníoll luaite sa tairiscint go mbeadh cumas labhartha Gaeilge ag duine den fhoireann innealtóireachta ionas go mbeifí in ann labhairt le muintir an oileáin maidir leis an togra. Déanfar measúnú ar chumas Gaeilge an duine a mholfar trí scrúdú cainte.
Tá an athfhorbairt ar ché Inis Oírr beartaithe le fada agus é ráite go bhféadfadh daoine a bheith i mbaol mura dtabharfar faoin obair. Dúirt an t-iar-aire Gaeltachta Éamon Ó Cuív in 2019 go marófaí duine éigin ar an gcé mura ndéanfaí í a athfhorbairt.
Tugadh cead pleanála d’fhorbairt ché Inis Oírr in 2008 agus cé go raibh sé beartaithe tús a chur leis an obair in 2020, bhí moill fhada eile i gceist.
