Tá fadchlár faisnéise dátheangach faoi Uachtarán na hÉireann, Micheál D Ó hUigínn i measc na gclár Gaeilge agus dátheangach a bhfuil maoiniú faighte acu faoin mbabhta is deireanaí den scéim Fuaim & Fís.
D’fhógair Coimisiún na Meán, a riarann an scéim, go raibh maoiniú €2.4 milliún curtha ar fáil chun tacú le craoltóirí Gaeilge agus dátheangacha agus le léiritheoirí neamhspleácha ar fud na tíre. Is ionann an €2.4 milliún sin do chláir Ghaeilge agus dhátheangacha agus 35% den maoiniú iomlán €7.1 milliún a bronnadh.
Cláir dhátheangacha iad formhór na gclár a bhainfidh leas as an maoiniú. As an 84 tionscadal teilifíse agus raidió a gheobhaidh maoiniú, cláir theilifíse Ghaeilge iad trí cinn acu.
Is ar ghasúir a bheidh péire de na trí chlár Gaeilge sin dírithe. Tá maoiniú €450,000 faighte ag an gcomhlacht léiriúcháin Paper Owl Films chun sraith eile den chlár beochana Lí Bán a dhéanamh do Cúla4. Tá €400,000 eile le bronnadh ar Meangadh Fíbín chun sraith darb ainm Cois Cladaigh a dhéanamh don chainéal Gaeilge do pháistí.
Clár faisnéise faoi dhomhan na rásaíochta curaí is ea Anam na Mara, an t-aon chlár Gaeilge atá dírithe ar dhaoine fásta a fuair maoiniú. Tá an clár á léiriú ag Venom Films agus le craoladh ar TG4.
Cláir dhátheangacha iad ocht gcinn de na tionscadail teilifíse a fuair maoiniú. Clár a mbíonn 30% de ar a laghad i nGaeilge an sainmhíniú atá ag Coimisiún na Meán ar chlár dátheangach.
Cláir dhátheangacha iad cúig cinn de na hocht gclár atá le craoladh ar TG4. Ina measc, tá fadchlár faisnéise faoin Uachtarán, Micheál D Ó hUigínn. Tá an clár á léiriú ag O’Sullivan Productions agus á stiúradh ag Alan Gilsenan. Meastar go gcraolfar an clár nuair a thiocfaidh deireadh leis an dara téarma ag Ó hUigínn ina Uachtarán ag deireadh na bliana agus go mbreathnófar siar ar a shaol. Ba é Ó hUigínn a bhunaigh Teilifís na Gaeilge, mar a thugtaí ar TG4, nuair a bhí sé ina aire rialtais.
Clár faisnéise eile is ea Dúlainn: An Mecca. Tá an clár le cur i láthair ag an aisteoir Brendan Gleeson agus caithfear súil ar thraidisiún an cheoil sa mbaile aitheanta sin i gcontae an Chláir.
Tugadh maoiniú do trí chlár teilifíse dátheangach atá le craoladh ar RTÉ.
Fuair ocht gcinn de tionscadail raidió, i nGaeilge nó dátheangach, maoiniú faoin mbabhta is deireanaí de Fuaim & Fís. Ina measc, tá €109,606 faighte ag Stiúideo Cuan ar an Spidéal chun séasúr nua de cheolchoirmeacha a thaifeadadh beo i Stiúideo Cuan agus a chraoladh ar RTÉ Raidió na Gaeltachta agus RTÉ Radio 1.
