Deir Volodymyr Zelensky gur bhris Vladimir Putin gealltanas a thug sé do Donald Trump nach ndéanfaí ionsaí ar infreastruchtúr fuinnimh san Úcráin.
Rinne an Rúis ionsaí ar an Úcráin cúpla uair an chloig i ndiaidh d’Uachtarán na Rúise sos cogaidh teoranta a aontú le hUachtarán Stáit Aontaithe Mheiriceá.
Labhair Trump agus Putin ar feadh breis is dhá uair a chloig tráthnóna Dé Máirt, agus cé gur dhiúltaigh Putin do mholadh faoi shos cogaidh iomlán tríocha lá d’aontaigh an bheirt go mbeadh sos ann maidir le hionsaithe ar infreastruchtúr fuinnimh agus eile.
Go gairid i ndiaidh an chomhrá gutháin sin scaoileadh 45 drón leis an gceantar timpeall ar Kyiv.
“I ndiaidh chomhrá Putin le hUachtarán Stáit Aontaithe Mheiriceá, comhrá ina ndúirt Putin go dtabharfadh sé ordú ag cur stop le hionsaithe ar infreastruchtúr na hÚcráine, bhí 150 drón ann thar oíche agus an t-infreastruchtúr agus rudaí eile mar sprioc acu.
“Ionsaíodh an córas iompair. Faraor buaileadh dhá ospidéal. Is é sin le rá, tá caint Putin ag teacht salach go mór ar an méid atá ag tarlú i bhfírinne,” a dúirt Zelensky ag preasócáid sa bhFionlainn.
Dúirt údaráis na hÚcráine go ndearnadh dochar do thithe agus carranna in Bucha agus ceantair eile agus gur gortaíodh beirt. Sa cheantar Sumy san oirthear, bhuail drón ospidéal agus b’éigean 100 othar a thabhairt slán as.
Lean an Úcráin lena gcuid ionsaithe diúracáin fadraoin ar an Rúis agus tuairiscíodh gur buaileadh ionad ola Krasnodar, ceantar sa deisceart. Mhaígh an Rúis gur scriosadh 57 drón de chuid na hÚcráine, a bhformhór i gceantar Kursk.
Dúirt Steve Witkoff, toscaire speisialta Donald Trump go gcuirfí tús le cainteanna faoi shos cogaidh idir an dá thaobh in Jeddah arís Dé Domhnaigh. Dúirt Witkoff le Fox News gurb é a bhí i nglaoch gutháin Putin agus Trump ná “beirt cheannairí iontacha ag teacht le chéile chun leas an chine dhaonna a dhéanamh”.
Dúirt Trump féin go raibh comhrá “an-mhaith agus an-tairbheach” aige le Putin.
