Tabharfar pá breise do cheannasaithe póilíní, ceannasaithe dóiteáin, agus captaein sna póilíní a bhfuil dhá theanga ar a dtoil acu i gcathair Redwood in California sna Stáit Aontaithe.
Ceadaíodh ag cruinniú de chuid chomhairle na cathrach le déanaí ‘biseach dátheangach’ d’oifigigh shinsearacha sna seirbhísí póilíneachta agus dóiteáin. Íocfar an chéad liúntas ar an gcéad lá pá i ndiaidh an 10 Márta 2025 agus beidh sé ar fáil do chainteoirí Spáinnise, Mandairínise, Cantainise, Cóiréise, agus Teanga Chomharthaíochta Mheiriceá.
Íocfar liúntas 2.5% dá mbunphá leis na hoifigigh atá i dteideal an bhisigh dhátheangaigh. Ní íocfar an liúntas ach amháin le daoine a mbraitear go dteastaíonn a scileanna teanga uathu ina gcuid oibre.
Ní mór do bhainisteoir na cathrach gach iarratas ar an liúntas a fhaomhadh agus caithfidh gach iarrthóir scrúdú cainte a dhéanamh a leagfaidh an tOifigeach Foirne amach. Caithfidh an t-oifigeach an marc ‘cumasach’ a fháil sa scrúdú sin. Beidh ar na hoifigigh a fhaigheann an liúntas a n-iarratas a athnuachan gach trí bliana lena chruthú go bhfuil an teanga fós in úsáid acu ina saol oibre.
Íocfar liúntas níos airde le hoifigigh a bhfuil ‘ardscileanna dátheangacha’ acu agus a bhíonn ag plé le cásanna ina mbíonn gá leis an dátheangachas ‘go rialta agus go leanúnach’. Íocfar liúntas 5% dá mbunphá leis na hoifigigh sin a meastar ‘ardscileanna teanga’ a bheith acu.
Ní mór don oifigeach a chuirfidh isteach ar an liúntas ard faomhadh speisialta a fháil ó bhainisteoir na cathrach agus an marc ‘líofa’ a bhaint amach sa scrúdú cainte.
Beidh ar oifigigh a ghlacann leis an liúntas breise a bheith ar fáil le seirbhísí aistriúcháin agus ateangaireachta a chur ar fáil don tseirbhís póilíneachta nó dóiteáin “ar fud na cathrach” agus a bheith ar fáil le labhairt leis na meáin chumarsáide ina dteanga bhreise.
Luaitear sa cháipéis eolais faoin liúntas nua go mb’fhéidir go mbeadh ar na hoifigigh dhátheangacha a bheith páirteach in “oibríochtaí idirghabhála leis an gcumarsáid dhátheangach a chur chun cinn leis an bpobal agus le heagraíochtaí”.
Táthar ag súil go mbeidh na hoifigigh dhátheangacha ar fáil freisin le páirt a ghlacadh i bhfiosrúcháin ina mbeidh tuiscint ar theangacha difriúla ag teastáil.
Ní bheidh aon riachtanas ann go mbeadh an dara teanga ag duine le ról sinsearach a fháil sna seirbhísí póilíneachta ná dóiteáin agus ní chuirfear iachall ar dhaoine atá sna róil sin cheana féin an dara teanga a fhoghlaim.
Íocfar liúntas 7.5% dá mbunphá le hoifigigh a bhfuil níos mó ná teanga amháin bhreise acu a fhad is atá an tríú teanga sin i measc na dteangacha a shonraítear sa cháipéis eolais. Ní íocfar liúntas níos airde ná 7.5% le duine a bhfuil níos mó ná trí theanga aige.
Ag tús na míosa seo d’fhógair Uachtarán Stáit Aontaithe Mheiriceá Donald Trump go ndéanfaí teanga oifigiúil den Bhéarla sna Stáit Aontaithe agus nach mbeadh stádas oifigiúil ag teanga ar bith eile sa tír.
“To promote unity, cultivate a shared American culture for all citizens, ensure consistency in government operations, and create a pathway to civic engagement, it is in America’s best interest for the Federal Government to designate one — and only one — official language. Establishing English as the official language will not only streamline communication but also reinforce shared national values, and create a more cohesive and efficient society,” a dúradh san Fhorordú Feidhmeach a d’eisigh Trump ar an 1 Márta.
