Ciontaíodh triúr ball den Ord Oráisteach as calaois a dhéanamh ar Bhord na hUltaise agus gearradh seirbhís pobail orthu triúr i gCúirt Dúiche Dhún Geanainn an tseachtain seo.
D’admhaigh Glen Henry, Lee Rodger Henry as an gCorr Chríochach go ndearna siad calaois trí uiríoll bréige agus d’admhaigh Nicholas Samuel Barnes as an mbaile céanna gur chabhraigh sé agus gur neartaigh sé leis an gcalaois.
Bhí róil shinsearacha ag an triúr acu i Lóiste Oráisteach Dhroim na Croise agus chuir siad isteach ar mhaoiniú £4,110 (€4,890) ó Bhord na hUltaise le haghaidh féile bheag agus le haghaidh ranganna ceoil sa bhliain 2021. Mar gheall ar na srianta a bhí i bhfeidhm an uair sin le scaipeadh an víris chorónaigh a chosc, níor tharla an fhéile ná na ranganna ceoil.
Íocadh cuid den deontas leis an lóiste sula raibh na hócáidí in ainm is a bheith ann agus bhí an dara cuid le híoc ina ndiaidh. Nuair nár tharla an fhéile ná na ranganna, cruthaíodh sonraisc bhréige le tabhairt don Bhord le go mbeadh an lóiste in ann an t-airgead a choinneáil.
Tháinig an chalaois chun solais nuair a bhí gnáth-iniúchadh a dhéanamh ar na cuntais, agus chuir Bord na hUltaise fios ar an PSNI. Fuarthas le linn fhiosrúchán na bpóilíní sonraisc agus ráitis bhainc inar tugadh le fios gur íocadh agus gur briseadh seiceanna.
Fuarthas freisin go raibh cuntas Comhar Creidmheasa ag Lóiste Oráisteach Dhroim na Croise agus gur íocadh na seiceanna ó chuntas bainc an lóiste isteach sa chuntas Comhar Creidmheasa.
Mhaígh lucht an ionchúisimh sa chúirt dúiche go bhfuair an lóiste na deontais ó Bhord na hUltaise, gur scríobhadh sonraisc bhréige, agus gur íocadh seiceanna ó chuntas amháin de chuid na heagraíochta le cuntas eile.
D’admhaigh Glen Henry gurbh é féin a chuir isteach na hiarratais ar mhaoiniú agus a scríobh na sonraisc bhréige. D’admhaigh Nicholas Samuel Barnes, a bhí ina chisteoir, gur scríobh sé féin na seiceanna. Dúirt Lee Henry, a bhí ina chathaoirleach, gur chuir sé a ainm leis na hiarratais ar dheontais ach go raibh sé féin dall ar an gcalaois.
