Feachtas sluamhaoinithe tosaithe ar son ionad tearmainn Gaeilge
Tá feachtas bailithe airgid ar siúl ag iarchaptaen iománaíochta Loch Garman, Diarmuid Lyng, agus ag a pháirtí, an file Siobhán de Paor, chun ionad tearmainn agus cultúir Gaeilge a thógáil i gContae Chill Chainnigh.
Le hocht bliana anuas tá tréimhsí tearmainn ina gcuirtear béim mhór ar an Ghaeilge agus ar an dúlra á reáchtáil ag Diarmuid agus Siobhán faoina dtogra Wild Irish Retreat agus anois tá fís acu tógáil ar an obair sin agus ionad fisiciúil a oscailt.
Is i nGaeltacht Chiarraí a chuir siad tús leis na tearmainn ach is i ndeisceart Chill Chainnigh atá siad ag cur fúthu anois, i dteach feirme, agus is ann atá sé i gceist acu an t-ionad a lonnú.
Áit chónaithe don bheirt agus dá dtriúr páistí a bheidh san ionad agus osclóidh siad na doirse don phobal áitiúil agus do chuairteoirí araon ar mian leo dul i dteagmháil leis an teanga, leis an chultúr, leis an nádúr agus le ceardaíocht thraidisiúnta, le cois nithe eile.
“Is iontach an rud é go bhfuil eagraíochtaí ann atá ag freastal ar chás na teanga ach is gá dúinn a bheith neamhspleách chomh maith,” arsa Diarmuid.
“Tá an Ghaeltacht faoi bhrú de bharr turasóireachta agus easpa tithíochta agus braithimidne, agus daoine eile, gur gá an teanga a thabhairt amach ar fud na tíre agus tearmainn a bhunú di, chun cuid den bhrú sin a scaoileadh ón nGaelteacht féin.”
Ba mhaith le Diarmuid agus Siobhán an teach feirme, na stáblaí agus an scioból atá ar an talamh a fhorbairt agus a athchóiriú ionas go mbeifear in ann ceardlanna, ceolchoirmeacha agus ócáidí eile a eagrú sa spás.
Tá sluamhaoiniú ar siúl acu chun cabhrú leo a bhfís a bhaint amach agus tá réimse leathan tairiscintí ann is féidir le daoine a cheannach chun tacú leis an fheachtas: ranganna Gaeilge, laethanta clainne, ceardlanna machnaimh, mar aon le saothair ealaíne agus ceolchoirm speisialta leis an cheoltóir iomráiteach Peia.
“Maidir le cruinneas Gaeilge tuigimid go géar nach muidne na daoine is fearr chun an togra seo a dhéanamh ach tá daoine ag teacht chugainn i gcónaí, ag impí orainn flúirseacht na teanga a roinnt leo,” arsa Siobhán.
“Tá aibhleog dhearg inár lámha againn, aibhleog a phiocamar suas sa Ghaeltacht, agus táimid ar tí tine nua a thosnú i gCill Chainnigh.”
Is féidir cuidiú le Diarmuid agus Siobhán an aibhleog sin a chothú trí pháirt a ghlacadh san fheachtas sluamhaoinithe anseo.
The post Feachtas sluamhaoinithe tosaithe ar son ionad tearmainn Gaeilge appeared first on NÓS.
