Sa réamhaisnéis is déanaí ó Met Éireann deirtear nach bhfuil aon athrú i ndán dúinn go luath agus ‘an t-ardbhrú fós i gceannas’, rud a fhágfaidh go leor eile den triomach agus den ghrian seo againn an chuid eile den tseachtain agus ag an deireadh seachtaine seo chugainn.
Táthar á thuar go mbeidh an teocht ard don tráth seo den bhliain an chuid eile den tseachtain agus an deireadh seachtaine, cé go bhféadfadh corrmhúr éadrom a bheith ann scaití.
Beidh sé ina ghrian inniu cé go bhféadfadh smúit teasa a bheith uirthi agus seans fánach ann go ndéanfaidh sé corrmhúirín éadrom.
Beidh an teocht idir 14 agus 20 céim Celsius agus dá fhaide siar sa tír seo thú is teo a bheidh sé.
Is ionann an tuar don lá amárach, Déardaoin, triomach is tréimhsí gréine agus gan ach corrmhúr éadrom á thuar. Beidh sé idir 13-17 céim Celsius ar a theo agus é beagán níos fuaire leis an gcósta thoir leis an leoithne éadrom anoir.
Triomach is mó atá á ghealladh dúinn arís ar an Aoine chomh maith le tréimhsí maithe gréine. Má shantaíonn tú braon báistí, d’fhéadfadh tú corrmhúr fánach a fháil ar chósta an Atlantaigh. Idir 13 agus 18 céim Celsius a bheidh an teocht agus an teas is mó san iarthar agus leoithne éadrom anoir aneas chugainn.
An léamh atá ag lucht na haimsire faoi láthair go mbeidh sé tirim is grianmhar ag an deireadh seachtaine cé go bhféadfadh corrbhrádán a bheith ann, go háirid sa gcuid thiar den tír.
Údar gairdis do lucht saoire agus fámaireachta triomach is teas seo an Aibreáin agus na Bealtaine ach údar imní é d’fheirmeoirí agus d’Uisce Éireann.
Tá cosc sé seachtaine curtha ag Uisce Éireann ar fheadáin uisce a úsáid i mBaile na nGallóglach i dTír Chonaill, sa Mhuileann Cearr san Iarmhí agus i gCeanannas agus sa Seanchaisleán i gcontae na Mí agus fainic curtha ag an tseirbhís go bhfuil an soláthar íseal in go leor áiteanna eile.
An mhí seo caite bhí fainic ag Copernicus, seirbhís aeráide an Aontais Eorpaigh, faoin mbaol a bhí ar an oileán seo ar fad go mbeadh an triomach seo díobhálach agus dúirt de bharr an laghdú ar an mbáisteach agus an leibhéal íseal fliuchrais sa gcré go raibh comharthaí struis le haithint ar an bhfásra sa tír.
Bíonn tionchar ag an triomach ar bharraí agus ar an bhfómhar agus dá bharr ar phraghas an bhia.
