Cé go mbeidh na ceithre chúige ag cur chun páirce i mBabhta 20 den Pro 14 an deireadh seachtaine seo, is dóigh gur ar chluiche Chonnacht a bheas aird fhormhór lucht leanta rugbaí na tíre seo. Ag a trí a chlog amárach, Dé Sathairn, cuirfidh foireann Andy Friend chun páirce ar an mBóthar Beag agus iad i gcoinne Caerdydd, an fhoireann atá san iomaíocht leo don tríú háit i nGrúpa A.
Níl ach ceithre phointe idir na foirne seo. Tá Cúige Chonnacht atá sa tríú háit, an suíomh órga, agus tá Caerdydd ceithre phointe le sruth sa gceathrú háit.
Má éiríonn leis na Connachtaigh bua a fháil nó a bheith cothrom ag deireadh an chluiche seo beidh sé dodhéanta ag Caerdydd an bhearna a laghdú mar nach bhfuil ach cluiche amháin fágtha le himirt acu sna réamhbhabhtaí. Sa gcás sin is iad fir an Iarthair a bheas ag imirt i gcomórtas Chorn na gCuradh, comórtas sinsearach luachmhar na hEorpa, an chéad bhliain eile.
Is dóigh nach mór an gríosú a bheidh le déanamh ag Friend sula gcuirfidh sé a chuid imreoirí chun páirce don chluiche tábhachtach seo. Ní cúis iontais ar bith é go bhfuil na ticéid uilig ar an mBóthar Beag díolta le fada an lá.
Sin an cúlra a bhaineann leis an gcluiche seo ach an mbeidh na Connachtaigh in ann an ceann is fearr a fháil ar Caerdydd, foireann a bhuaigh comórtas Chorn an Dúshláin anuraidh agus a thug neart le déanamh d’fhoireann na Mumhan seachtain ó shin?
Bhí a ndóthain go maith le déanamh ag na Connachtaigh féin an deireadh seachtaine seo caite nuair a fuair siad an ceann is fearr le pointe amháin ar Zebre (6 – 5) san Iodáil.
Is fiú a mheabhrú nach ionann Zebre agus Cúige Mumhan, agus ní dea-chomhartha é go raibh deacrachtaí ag na Connachtaigh ina gcoinne. Seans dá bhrí sin gurb í an fhoireann ón mBreatain Bheag is fearr a fuair deis réiteach don chluiche seo sa gcluiche crua a bhí acu i gcoinne na Muimhneach.
Mar sin féin, is deacair Cúige Chonnacht a shárú ar an mBóthar Beag agus bheadh díth céille ar an té a rachaidh ag cur airgid síos ina gcoinne.
Tá Cúige Laighean agus Cúige Mumhan cinnte dá n-áiteanna sna babhtaí leathcheannais agus sna babhtaí ceathrú ceannais den chomórtas seo. Mar sin féin beidh an dá chúige ag iarraidh chuile leas a bhaint as cluichí an deireadh seachtaine seo mar réiteach do na dúshláin mhóra a bheas rompu faoi cheann seachtaine nuair a bheas siad ag imirt i gcluichí leathcheannais Chorn na gCuradh.
Tráthnóna a bheas na Muimhnigh as baile i gcoinne Treviso san Iodáil, foireann eile atá fós san iomaíocht do Chomórtas na gCuradh an chéad séasúr eile. Chonaic muid an Satharn seo caite nach aon ribín réidh iad an fhoireann Iodálach seo ar éirigh leo a bheith ar comhscór leis na curaidh, Cúige Laighean.
Is cinnte go dtabharfaidh siad a ndóthain le déanamh do na Muimhnigh.
Beidh cluiche suimiúil á imirt san RDS an Satharn beag seo idir Glaschú agus Cúige Laighean, na foirne atá ar bharr an dá ghrúpa.
Níl le baint as an gcluiche seo ag ceachtar foireann ach mórtas agus bród, b’fhéidir. Mar sin féin tabharfaidh sé deis do Leo Cullen an fhoireann a ullmhú sula dtiocfaidh Toulouse go dtí Staid Aviva faoi cheann seachtaine agus d’fhéadfaidís gar a dhéanamh do Chúige Mumhan, dá n-éireodh leo Glaschú a shárú.
Inniu a bheas Cúige Uladh ag imirt i nDún Éideann agus iadsan faoi bhrú greim a choinneáil ar an dara háit i nGrúpa B. Beidh iomaíocht fhíochmhar idir iad féin agus foireann an bhaile atá trí pointe taobh thiar díobh. Ba cheart go mbeadh sárchoimhlint sa gcluiche seo ach beidh na hUltaigh i dtrioblóid má imríonn siad mar a d’imir siad seachtain ó shin nuair a náirigh foireann Ghlaschú iad (30-7).
