Goilleann sé orm go roghnaítear droim láimhe a thabhairt don vacsaíniú

Le seachtain, tháinig an scéala go raibh bean óg as Contae an Chláir tar éis bháis de bharr ailse. 26 bliain d’aois a bhí Laura Brennan, agus mharaigh ailse cheirbheacs í. 

Foilsíodh físeán di le deireanaí, agus í ag caint ar an vacsaín HPV, ag rá gur faraor ghéar nach bhfuair sí é. Ainneoin gur bean óg a bhí inti, bhí sí róshean don vaicsín nuair tosaíodh á tabhairt do chailíní sa scoil. 

Goilleann sé orm féin nuair a chasaim le daoine a roghnaíonn droim láimhe a thabhairt do chomhairle dochtúra agus saineolaithe faoi vacsaíniú. Ach níl a fhios agam go mbeadh sé de láidreacht ionam feachtasaíocht go poiblí ar an ábhar agus mé i mbarr mo shláinte. Ghoill sé chomh mór sin ar Laura Brennan, agus cé go raibh sí ag fáil bháis, go ndeachaigh sí ag obair ag impí ar dhaoine an vacsaín a fháil.

Cé go raibh sí go dona tinn, níor stop sé sin daoine ag feachtasaíocht ina haghaidh, agus in aghaidh gach cineál fianaise atá againn go n-oibríonn vacsaíniú agus go bhfuil siad sábháilte. 

Tá sé in am deireadh a chur leis seo, agus deireadh a chur le mná óga ag fáil bháis. An rud is measa a dhéanfaidh vacsaín an HPV ná beagán pian a chothú san áit a thabharfar an tsnáthaid. Cuirfidh frithghníomhú ailléirgeach as do chailín amháin as milliún. Is fearr sin fós ná ailse. 

Chonaic mé Laura Brennan ag caint faoin mbail a d’fhág an tinneas seo uirthi. D’fhulaing sí ceimiteiripe agus radaíocht. Chaith sí laethanta ina luí ar an urlár in aice leis an leithreas, nó sa leaba agus mias aici ag cur amach. Rinneadh damáiste dá putóga agus dá lamhnán. Bean óg a bhí inti agus bhí deireadh míostraithe ag dul di. Bhí pian uafásach uirthi. Mharaigh sé í.

Cé go raibh sé seo ar fad i ndán di, lean sí ag feachtasaíocht agus ag déileáil le daoine gránna a d’ionsaigh í ag rá go raibh comhlachtaí móra cógaisíochta á híoc. Nó go raibh an milleán uirthi féin, mar arnó, go hiondúil, tá baint ag an ngnéas leis an ailse seo. Dá mbeadh sí ina cailín ‘maith’ ní bheadh sé tolgtha aici. 

Má tá aon imní ort faoi aon vacsaín a fháil, nó ceann a thabhairt do pháiste, smaoinigh orthu go dona tinn agus ag fáil bháis. Tá rudaí go dona nuair a chaithfidh bean óg atá ag fáil bháis dul ar camchuairt ar fud na tíre in iarracht cur ina luí ar thuismitheoirí vacsaín a chinnteoidh nach dtarlóidh an rud céanna dá gcuid iníonacha, a thabhairt dóibh. 

Fiú más féidir fáil réidh leis an ailse seo, tá an próiseas fada, crua agus gruama.

Ach an oiread le Emma Mhic Mhathúna, bhí tionchar ag Laura ar chúrsaí. Ó thosaigh Laura ar a cuid oibre, tháinig ardú 20% ar an líon cailíní a fuair an vacsaín. Is é an trua mór go bhfuil aithne ar bith againn ar na mná cróga seo. 

Níos mó
NÓS | NÓS