Scéal ‘Sheosamh an Chlub’ agus ceithre imeacht eile

Taispeántas Ealaíne, Ionad Cultúrtha an Dochtúir Ó Loingsigh, Baile Bhuirne, leanúnach – go deireadh na Bealtaine.

‘Ag Fás de Shíor’ is teideal do thaispeántas ealaíne de chuid an ghrúpa Tacaois, dream ó ionadaithe lae i mBaile Bhuirne, Béal Átha an Ghaorthaoidh agus Cill na Martra. Bíonn ceardlanna ar bun acu uair sa tseachtain, faoi stiúir an ealaíontóra Pauline Dodds. Toradh na ranganna seo — saothar spreagúil, álainn a a deirtear liom — atá ar taispeáint faoi láthair. Ba í Lena Cronin ó Bhord Oideachais agus Oiliúna Chorcaí a sheol, san Ionad Cultúrtha Déardaoin seo caite. Is féidir é a fheiscint go fóill mar go mbeidh sé ar siúl go dtí deireadh na Bealtaine.

Lá Domhanda an Ghlóir, ceiliúradh i gColáiste na Tríonóide, Dé Máirt 16 Aibreán @ 18:00

Déanfar ceiliúradh ceolmhar ar Lá Domhanda an Ghlóir 2019 i gColáiste na Tríonóide tráthnóna. Tá an ócáid seo á heagrú ag foireann an tionscail ABAIR, agus is iad a thabharfaidh spléachadh le linn na hócáide ar an taighde atá ar siúl acu ar an nguth daonna agus ar ghuthanna sintéiseacha don Ghaeilge sa tSaotharlann Foghraíochta agus Urlabhra. Léireofar na háiseanna atá á bhforbairt faoi láthair i réimsí an oideachais agus an mhíchumais. Is i Mol an tSeomra Fhada ón 18:00 a bheidh an teacht le chéile ar siúl. Tá fáilte roimh chách!

Kíla, Whelan’s Dé Máirt 16 Aibreán @ 19:30 (agus gach Máirt ar feadh cúpla seachtain)

Is beag seachtain anuraidh nach raibh baill an bhanna Kíla ar stáitse éigin, go háirithe agus iad ag ceiliúradh 30 bliain ar an mbóthar. Tá sos á thógaint acu ó na coirmeacha móra agus iad ag díriú ar sheisiúin a bheidh níos lú as seo go ceann cúpla seachtain, oícheanta Máirt. Is idir 19:30-21:30 a bheidh cuid de bhaill an bhanna ag tabhairt faoi sheisiún neamhfhoirmiúil in aice na fuinneoige i Whelan’s san ardchathair. Beidh aíonna speisialta ina dteannta ó am go ham chomh maith!

Scéal na Beatha, le taispeáint i gClub an Chonartha, Dé Céadaoin 17 Aibreán @ 21:30 

Bhí deis agam an tseachtain seo caite an scannán nua faoi Sheosamh Ó Conchúir a fheiscint nuair a thaispeánadh é i gClub an Chonartha, áit a raibh a mhuintir agus a chairde bailithe. De ghnáth nuair a thaispeántar a leithéid, is le bualadh bos a bheifeá ag súil i ndeireadh ón slua, ach tost a thit orthu siúd a bhí sa tseomra. Léiriú ar an gcumhacht a bhain leis an scannán seo, faoi fhear a mbeadh cur amach maith ag léitheoirí na hirise seo air óna ról mar bhainisteoir ar an gClub in Uimhir 6. Is mó caipín eile a chaith Seosamh, nó Joe – ealaíontóir ab ea é, ceoltóir agus file chomh maith. Fiosraíonn Máiréad Ní Thréinir ó Below the Radar na buanna éagsúla sin agus í chomh maith á leanúint sna laethanta deireanacha dá shaol agus é in Oispís Chrois Araild. Taispeánfar é ar TG4 Dé amárach agus ar scaileán sa Chlub chomh maith.

Aon Scéal? Tigh Uí Chatháin, Baile an Fheirtéaraigh, Déardaoin 18 Aibreán @ 21:00

Is minic ócáidí ealaíona ar bun ar leithinis Chorca Dhuibhne agus is amhlaidh a bheidh an Déardaoin beag seo chomh maith. Léifidh an file (agus potadóir aitheanta cumasach) Louis Mulcahy a shaothar, agus cloisfear ceol ó Pheadar Ó hUallaigh chomh maith ar an oíche, mar chuid den tsraith imeachtaí dár teideal ‘Aon Scéal?’

Is ag a 21:00 i dtábhairne Uí Chatháin a bheidh sé ar siúl. Go n-éirí ádh leo.

Níos mó
NÓS | NÓS