Comórtas Peile na Gaeltachta agus imeachtaí eile
Comórtas Peile na Gaeltachta, Leithinis Chorca Dhuibhne, 31 Bealtaine – 3 Meitheamh ‘19
Tá cuma an-bhreá ar an dá pháirc a bheidh á úsáid do Chomórtas Peile na Gaeltachta i gCorca Dhuibhne an deireadh seachtaine seo os na pictiúir atá á gcur in airde ag CLG na Gaeltachta, a bhaineann úsáid go rialta as na hacmhainní ó dheas!
‘Sprid. Croí. Caid. Teanga.’ mana an chumainn, agus léireofar amhlaidh ar an leithinis mar gur ann a bhaileoidh lucht na bhfoirne do dheireadh seachtaine na Cincíse agus don gcomórtas aitheanta, spraíúil, Gaelach seo, atá 50 bliain ar an bhfód i mbliana. Beidh an áit faoi dháir le cluichí agus imeachtaí eile siamsiúla. Mura féidir leat a bheith ann, éist le RTÉ Raidió na Gaeltachta, beidh clúdach cuimsitheach ag an rannóg spóirt ar na cluichí ar fad, mar aon le tuairiscí agus anailís, ó mhaidin go tráthnóna.
‘An Bealach go Baile Ghib’, Solstice Arts Centre, An Uaimh, Co. na Mí Dé Sathairn 1 Meitheamh @ 19:30
Díoladh iomlán na dticéad le An Bealach go Baile Ghib a fheiscint, nuair a thaispeánadh faoi dhó é in Ionad Ealaíona Solstice san Uaimh i mí an Mhárta. Is ríléir go bhfuil tóir air, agus chuige sin beidh deis arís eile saothar Ronan Carley a fheiscint Dé Sathairn.
Sa bhliain 1937 bhog go leor daoine ó cheantair Ghaeltachta go Baile Ghib i gContae na Mí, de dheasca scéim athlonnaithe a chuir an Coimisiún Talmhaíochta i bhfeidhm, agus díríonn an clár faisnéise ar stair agus ar fhiúntas na scéime sin, le hagallaimh leo siúd a bhog mar chuid de chomh maith.
Oíche cheiliúrtha le Seán Ó Sé, Lárionad Cathrach Bhéal Tairbirt, Co. an Chabháin Dé Domhnaigh 2 Meitheamh @ 20.00
Is i mBéal Tairbirt i gContae an Chabháin a bheidh Fleadh Cheoil na háite sin ar siúl an deireadh seachtaine fada seo. I measc na n-ócáidí atá eagraithe, beidh seisiún le Seán Ó Sé sa Lárionad Cathrach, atá beartaithe d’oíche Dé Domhnaigh. Scéalta, amhráin agus ceol ón gCorcaíoch a chloisfear agus ní leis féin a bheidh sé! Tá liosta le háireamh díobh siúd a bheidh ina chuideachta, cuirim i gcás Séamus Fay, a bhfuil cáil bainte amach aige lena phortaireacht bhéil; an t-amhránaí Cathal Lynch; cairde áitiúla Sheáin agus baill ó Chomhaltas NYAH. Níl ansin ach méid áirithe, beidh scata eile ag tabhairt faoin stáitse i gcaitheamh na hoíche chomh maith!
Ó Bhéal (mar chuid d’imeachtaí Fhéile Chuan Chorcaí), The Hayloft Bar, Corcaigh Dé Luain 3 Meitheamh @ 20:30
Cuirfear tús le Féile Chuan Chorcaí (Cork Harbour Festival) Dé Sathairn beag seo agus imeachtaí go leor ar an gclár acu. Dhírigh mo shúil ar ócáid faoi leith in ómós do Dhomhnall Mac Síthigh, mar chuid de shraith ar a dtugtar Ó Bhéal, a bhíonn ar siúl rialta go leor ó dheas. Is i gcomhar le Foras na Gaeilge atá an oíche filíochta dhátheangach áirithe seo eagraithe, ag a mbeidh Ceaití Ní Bheildiúin, Eibhlís Carcione, Billy Ramsell, Bríd Ní Mhóráin, Bernadette Nic an tSaoir, Julie Field agus Paul Casey, agus iad ag léamh dánta Dhomhnaill agus sleachta óna leabhair. Beidh aistriúcháin ar a shaothar teilgthe os a gcionn in airde. Anuas ar sin, beidh cara mór an fhile agus an údair, Breanndán Ó Beaglaoich le clos i mbun an cheoil.
