Tá rabhadh eisithe ag Met Éireann go mbeidh sé ina theaspach i sé chontae ar an gcósta thiar amárach óna haon a chlog go dtí a seacht a chlog tráthnóna.
Gaillimh, Maigh Eo, An Clár, Luimneach, Ciarraí agus Corcaigh na contaetha is teo a bheidh agus is leosan a bhaineann an rabhadh seo.
Beidh an teocht idir 21 agus 25 céim Celsius sa gcuid is mó den tír ach beidh fuarú beag ag muintir an chósta in Ulaidh agus i Laighin a bhuíochas den leoithne gaoithe anoir aduaidh.
Tá Met Éireann á thuar nach mbeidh an spalladh gréine seo linn ach amárach agus Dé hAoine, cé go bhféadfadh sé éirí scamallach ar an gcósta thiar ar an Aoine agus ceathanna toirní a bheith in áiteanna.
Níl á ghealladh dúinn faoi láthair ach an dá lá gréine seo mar is díle bháistí agus stoirmeacha toirní a bheas i ndán dúinn arís faoin Satharn.
De réir lucht an Met Office ní bheidh na ceathanna chomh trom ná chomh fairsing san oirthuaisceart.
Deir lucht Met Éireann go ndéanfaidh an bháisteach a bealach soir Muir Éireann faoin iarnóin Dé Sathairn agus go ndéanfadh sé lá te, idir 19 agus 25 céim Celsius.
Lá bog ceathach atá romhainn ar an Domhnach agus an teocht níos nádúrtha don taobh seo domhan, idir 16 agus 20 céim Celsius.
Tá fainic curtha ag an Roinn Gnóthaí Eachtracha ar dhaoine a bheidh ag dul thar sáile go bhfuil rabhadh oráiste fógartha ag Rialtas na Fraince, mar a bhfuil daoine maraithe ag an teas.
Níl Met Éireann ag tuar go mbeidh an teocht in aon ghaobhar don 40 céim atá acu ar mhór-roinn na hEorpa ach tá comhairle eisithe ag Feidhmeannacht na Seirbhíse Sláinte, an HSE, faoin gcontúirt a bhaineann leis an teas seo nach bhfuil aon chleachtadh againn air.
Ráig an tSahára atá baiste ar an tonn teasa san Eoraip agus teas damanta sa Fhrainc, sa Spáinn, sa Ghearmáin agus san Iodáil. Sruth aer te aníos as an Mhagraib in iarthuaisceart na hAfraice agus an Spáinn is cúis leis an aimsir the.
Deir an HSE gur cheart dúinn cúram speisialta a dhéanamh do dhaoine a ngoillfeadh an teaspach seo níos measa orthu – seandaoine, naíonáin agus páistí óga, daoine a bhfuil deacrachtaí croí nó anála acu agus daoine a bhfuil fadhbanna acu lena sláinte intinne. Iarrtar ar lúthchleasaithe, oibrithe láimhe, tógálaithe agus daoine a bhíonn ag dul don spórt neart uisce a ól agus a bheith fíorchúramach ar fhaitíos go mbuailfeadh an ghrian iad.
Is míthráthúil go bhfuil cosc snámha de bharr truaillithe i bhfeidhm ar thránna go leor i mBaile Átha Cliath nuair is breátha an uain. Tá comhairle á cur ag Sábháilteacht Uisce na hÉireann a bheith stuama agus tú ag tabhairt faoin uisce le faoiseamh a fhail ón teas. Ná téigh amach thar do dhomhain féin, ná tabhair d’aghaidh amach agus tú ag snámh, ná téigh ag snámh i d’aonar, seiceáil aon bhratacha sábháilteachta atá ar an trá, cloígh le haon treoracha atá crochta ar an trá agus ná téigh ag snámh agus ól déanta agat.
