Electric Picnic agus ceithre imeacht eile
An Phicnic Leictreach, An Sráidbhaile, Co. Laoise, 30 Lúnasa – 1 Meán Fómhair ’19
Má tá an t-ádh leat ticéad don bPicnic Leictreach a bheith i do sheilbh, bain bús as an deireadh seachtaine. Is ar an bpríomhstáitse anocht a bheidh Hozier, David Keenan, Dermot Kennedy agus Billie Eilish. Beidh leithéidí The Strokes, The 1975, Kodaline agus Florence and the Machine le feiscint ar an ardán sin as seo go Domhnach.
Níl ansin ach stáitse amháin — tá go leor ar an láthair, ina measc arís eile i mbliana, beidh An Chollchoill. Is ann a bheidh Doireann Glackin agus Sarah Flynn, Oisín Mac Giolla Bhríde, Dó Fá Dó, Lauren Ní Chasaide agus go leor ceoltóirí cumasacha eile. Sa Phuball Gaeilge, níl aon easpa siamsaíochta ach an oiread.
Beidh ceol le clos ann ó Liam Ó Maonlaí, Muireann Ní Bhaoill agus Thatchers of the Acropolis, mar aon le cainteanna spreagúla IMBOLC, greann le GaelGÁIRÍ, agus podchraoltaí beo, ina measc Beo ar Éigean agus Motherfoclóir.
Celtic Dance Party, Céilí agus Dioscó, Lost Lane, Dé hAoine 30 Lúnasa @ 20:00
Beidh céilí bríomhar ar bun i Lost Lane, i lár chathair Átha Cliath anocht! An fuirseoir Emma Doran a bheidh i bhfeighil na hócáide, atá bunaithe ar stíl chéilithe na Gaeltachta ó na 1990’daí! Díríonn Emma ar an dtréimhse sin ama agus í i mbun cainte le Julie Jay, a leath bhádóir ar an bpodchraoladh ‘Up to 90’.
Tá fios a gcúram acu, le nithe éagsúla ón ré sin faoi chaibidil acu agus a n-aíonna speisialta go rialta! Inseoidh Emma scéalta faoin nGaeltacht i rith na hoíche, agus treoracha á thabhairt aici do na rinceoirí! Eoin Dillon agus lucht Celtic Dance Party a bheidh i gceannas ar an gceol do na rincí aitheanta. Beidh dioscó ar siúl ina dhiaidh sin, nuair a bheidh deireadh leis na steipeanna traidisiúnta.
Cúrsa sealgaireachta, Scoil Chócaireachta an Daingin, Dé Sathairn 31 Lúnasa @ 09.30
Tá buntáistí go leor ag baint le bheith ag ithe feamainne – foinse maith do mhianraí agus vitimíní mar aon le frithoscaídeoirí; agus é ar fáil gan aon chostas, cois trá! Ach conas gur cheart é a bhailiú, cad is féidir a ithe go díreach agus cad é an tslí is fearr chun é a chócaráil?
Beidh Darach Ó Murchú ag freagairt na ceisteanna sin agus é i mbun ceardlanna ar shealgaireacht agus ar bhia na mara, i Scoil Chócaireachta an Daingin, Dé Sathairn beag seo. Bhí Darach i mbun cainte le Helen Ní Shé ar An Saol Ó Dheas maidir leis seo agus is féidir éisteacht lena chuid cainte ag an nasc seo, go ngeobhaidh sibh breis eolais!
John Spillane, ceardlann, agallamh agus coirm, Abbey Tavern, Binn Éadair Dé Sathairn 31 Lúnasa óna 14:00
D’fhéadfá an lá a chaitheamh i gcuideachta an cheoltóra John Spillane Dé Sathairn. Is i mBinn Éadair a bheidh sé le sraith imeachtaí. Beidh ceardlann scríbhneoireachta ar siúl aige ag tús an lae; mar aon le hagallamh poiblí, ina gcuirfidh an craoltóir Carl Corcoran ceisteanna air (le tacaíocht ó IMRO Ireland). Is ag deireadh an lae a bheidh coirm aige ansin. Lá fada! Fair play to him.
Imeachtaí éagsúla, Tigh Tábhairne The Cobblestone, Margadh na Feirme:
Gatehouse, Dé Sathairn 31 Lúnasa @ 21:00
The Night Before Larry Got Stretched, Dé Domhnaigh 01 Meán Fómhair @ 20:30;
Session with the Pipers, Dé Máirt 3 Meán Fómhair @ 21:30
Beidh cúpla ócáid cheolmhar ar siúl i dtábhairne an Cobblestone i Margadh na Feirme sna laethanta amach romhainn!
Is anocht a bheidh an banna Gatehouse ar an láthair, agus rianta óna n-albam nua (Heather Down the Moor) á sheinnt acu, shamhlóinn!
The Night Before Larry Got Stretched a tugtar ar oíche amhránaíochta agus airneáin a bhíonn ar siúl ar an gcéad Domhnach den mhí. Is ócáid shóisialta atá ann, eagraithe ag grúpa amhránaithe. Is í Máire Ní Choilm a bheidh mar aoi mhí Mheán Fómhair, agus í páirteach sa seisiún amanathar.
Ócáid eile a bhíonn ar bun go rialta ná Session with the Pipers, nuair a thagann ceoltóirí le cheile ar an gcéad Mháirt don mhí. Is iad Jimmy O’Brien-Moran (Píob Uilleann), Dan Gurney (bosca), Christina Dolphin (feadóg mhór) agus Cárthach Mac Craith (amhráin) a bheidh páirteach in ócáid na míosa seo, (le tacaíocht ó An Chomhairle Ealaíon).
Beidh an gabhar á róstadh i Margadh na Feirme, níl aon dabht faoi sin!
