Tá cáineadh géar déanta ag an NUJ ar Ian Paisley Jnr as ‘ionsaí pearsanta’ a dhéanamh ar iriseoir as alt a scríobh faoin DUP, Stormont agus ceist an achta Ghaeilge.
Scríobh Paisley 750 focal ag caitheamh anuas ar Sam McBride, eagarthóir polaitíochta an Newsletter, nuair a foilsíodh píosa anailíse leis an iriseoir inar mhaígh sé gur túisce a ghlacfadh an DUP le hathrú ar an dlí maidir le ginmhilleadh ná mar a ghlacfaidís le hacht Gaeilge.
Dúirt McBride gurb amhlaidh go raibh sé oibrithe amach ag daoine sa DUP gur mó vótaí a chaillfí trí ghlacadh le hacht Gaeilge ná mar a chaillfí sa chás go ligfí tríd an dlí nua ginmhillte a tháinig chun tosaigh in Westminster.
Thuill alt McBride racht ó Ian Paisley Jnr a bhain siar as an iriseoir agus a spreag roinnt tráchtanna gránna ó dhaoine eile.
On Saturday, I analysed the possibility of devolution returning (https://t.co/rKuh3YCqNf). In response, DUP MP Ian Paisley has published a series of untrue allegations about me & brought into it my character & my school. A DUP Cllr has widened it to my apolitical elderly parents.
— Sam McBride (@SJAMcBride) September 17, 2019
Cháin an NUJ ionsaí “míchuibhiúil gan údar” Paisley agus tá rúnaí an NUJ in Éirinn Séamus Dooley chun scríobh chuige chun míshástacht an cheardchumainn a chur in iúl dó.
Dúirt Dooley gur “iarracht shoiléir a bhí ann “dochar a dhéanamh do cháil ghairmiúil” McBride, “iriseoir coinsiasach”.
“Tá Paisley imithe thar cailc maidir le cad is dioscúrsa inghlactha polaitiúil ann agus tá ionsaí pearsanta déanta aige a bhfuil díobháil mhór ag baint leis,” a dúirt Séamus Dooley. Dúirt Dooley go raibh súil aige go n-aithneodh ceannairí an DUP ionracas McBride mar iriseoir a bhfuil a dhintiúir cruthaithe le fada aige.
Dúirt McBride go raibh a thuairim á tabhairt aige mar iriseoir gairmiúil.
I believe in robust free speech & people can of course dismiss my analysis (or even my socks) as wildly mistaken. But what I write is my honest professional – not personal – opinion. Sincere thanks to @Seamusdo, the NUJ & others for their support. https://t.co/3nkm5wjDMi
— Sam McBride (@SJAMcBride) September 17, 2019
Cháin ceannaire an UUP Robin Swann Ian Paisley chomh maith.
Dúirt Swann “údar mór díomá é ionsaí pearsanta Ian Paisley Junior ar Sam McBride” agus go raibh sé “truamhéalach” ag daoine eile tuismitheoirí an iriseora a tharraingt isteach sa scéal ar na meáin shóisialta.
