2 Feabhra
Chuir foireann rugbaí na hÉireann drochthús leis an mbliain nuair a chailleadar i gcoinne Shasana i mBaile Átha Cliath ina gcéad chluiche i gCraobh na Sé Náisiún. Chríochnaigh foireann Joe Schmidt sa tríú háit sa chomórtas agus bhí tuilleadh crá croí rompu
3 Márta
Níor chuir an sneachta a dhath mairg ar fhoireann chamógaíochta Shleacht Néill agus Craobh Shinsir na hÉireann buaite acu don tríú bliain as a chéile ag tús mhí an Mhárta
17 Márta
Bhí Henry Shefflin ag ceiliúradh i bPáirc an Chrócaigh arís Lá Fhéile Pádraig agus é i gceannas ar fhoireann Bhaile Héil a bhuaigh ar Naomh Tomás i gcluiche ceannais na hÉireann
17 Márta
Don dara bliain as a chéile, rinne peileadóirí Chora Finne slad ar a gcéilí comhraic sa chluiche ceannais peile nuair a chuir siad na Crócaigh de dhroim seoil i bPáirc an Chrócaigh
31 Márta
Bhí údar ceiliúrtha ag peileadóirí Mhaigh Eo i bPáirc an Chrócaigh faoi dheireadh agus cluiche ceannais Roinn 1 na sraithe buaite acu i gcoinne Chiarraí
11 Bealtaine
Drochscéala a bhí ann do Chúige Laighean mí Bealtaine nuair a fuair Saracens an ceann is fearr orthu i gcluiche ceannais Chorn na gCuradh
7 Iúil
Rinne iománaithe Laoise gaisce mí Iúil nuair a dhíbir siad Áth Cliath as Craobh Shinsir na hÉireann
21 Iúil
Údar mór díomá a bhí ann do lucht gailf na hÉireann nuair a chlis go dona ar Rory McIlroy i bPort Rois ag tús Chraobhchomórtas Oscailte na Breataine. Bhí an tír uile faoi gheasa ag Shane Lowry roimh dheireadh na seachtaine nuair a bhuaigh fear Uíbh Fhailí a chéad mhórchomórtas
23 Iúil
Rinne an rábálaí óg Rhasidat Adeleke gaisce mí Iúil nuair a thug sí boinn óir léi sa gcomórtas 100m agus 200m ag Féile Oilimpeach Óige na hEorpa
18 Lúnasa
Ba iad Tiobraid Árann rithe iomána na hÉireann ó thugadar leo Corn Mhic Cárthaigh mí Lúnasa tar éis dóibh an ceann is fearr a fháil ar Chill Chainnigh sa chluiche ceannais
31 Lúnasa
Bliain tar éis dó bonn óir a bhuachan lena dheartháir Gary ag Craobh Rámhaíochta an Domhain, bhí Paul O’Donovan ag ceiliúradh arís nuair a bhuaigh sé féin, agus Fintan McCarthy ina leathbhádóir aige an geábh seo, bonn óir eile
1 Meán Fómhair
Don dara bliain as a chéile thug rámhaí eile de chuid na hÉireann bonn óir abhaile nuair a bhuaigh Sanita Puspure an Chraobh W1x- san Ostair
9 Meán Fómhair
Má chlis foireann chamógaíochta na Gaillimhe i mbabhtaí leathcheannais na hÉireann le roinnt blianta anuas, thapaigh siad a ndeis in 2019 agus thug siad taispeántas cumasach uathu i gcoinne Chill Chainnigh chun Craobh na hÉireann a bhuachan
14 Meán Fómhair
Bhí cúig chúis cheiliúrtha ag peileadóirí Átha Cliath mí Mheán Fómhair agus Craobh Shinsir Peile na hÉireann tugtha leo acu don chúigiú bhliain as a chéile. B’éigean dóibh Ciarraí a imirt faoi dhó sula bhfuair siad an ceann is fearr orthu ach faoi dheireadh bhí gaisce déanta acu nach ndearna aon chontae eile
15 Meán Fómhair
B’iontach go deo an deireadh seachtaine a bhí ag lucht peile na hardchathrach agus Craobh Peile na mBan buaite ag mná Átha Cliath lá i ndiaidh bhua na bhfear ar an ngort céanna. Cluiche crua, fisiciúil a bhí ann i gcoinne na Gaillimhe ach sheas mná Átha Cliath an fód go daingean agus d’éirigh leo an tríú craobh as a chéile a chrochadh leo
23 Meán Fómhair
Bhuaigh Dundalk an Phríomhroinn i Sraith na hÉireann in 2019, an cúigiú huair acu le sé bliana. Bhí Dún Dealgan 11 pointe chun cinn ar Shamrock Rovers sa deireadh
28 Meán Fómhair
Cé gur chuir Éire tús maith le Corn Rugbaí an Domhain nuair a fuair siad an ceann is fearr ar Albain, thit rudaí as a chéile sa chéad chluiche eile nuair a tháinig an tSeapáin aniar aduaidh ar fhoireann na hÉireann
29 Meán Fómhair
Bhí scéal John Delaney agus an FAI ina údar mór conspóide ó mhí an Mhárta ach d’éirigh Delaney as ar deireadh thiar mí Mheán Fómhair agus an chuma air gur ina phraiseach atá cumann sacair na hÉireann
12 Deireadh Fómhair
Ba é Rhys McClenaghan an chéad ghleacaí riamh as an tír seo a bhuaigh bonn i gCraobh an Domhain nuair a chríochnaigh sé sa tríú háit ar an gcapall corr in Stuttgart
18 Deireadh Fómhair
Chaithfeadh foireann sacair na hÉireann an ceann is fearr a fháil ar an Danmhairg chun áit a bhaint amach ag EURO 2020 ach cé gur thug imreoirí Mick McCarthy taispeántas réasúnta maith uathu, chríochnaigh an cluiche sin ar comhscór. Níl de rogha ag na hÉireannaigh anois ach triall ar na babhtaí cáilithe
19 Deireadh Fómhair
An Nua-Shéalainn a bhí roimh fhoireann na hÉireann i mbabhtaí ceathrú ceannais Chorn an Domhain agus níor chuir sé iontas ar mhórán nuair a bhuaigh na ‘All Blacks’ go héasca. Chuir an cluiche sin deireadh le ré Joe Schmidt i gceannas ar fhoireann na hÉireann
2 Samhain
Rinne Katie Taylor éacht eile ag tús mhí na Samhna. Tar éis di gach craobh a bhuachan sa rannóg éadrom-mheáchan, chuaigh Taylor suas go dtí an chéad rannóg eile, éadrom-mheáchan trom. Fuair sí an ceann is fearr ar Christina Linardatou agus thug Craobh WBO abhaile léi
3 Samhain
Bhí an-bhliain ag foireann haca ban na hÉireann in 2018 nuair a bhain siad áit amach i gcluiche ceannais Chorn an Domhain. Ní raibh aon chaill ar 2019 ach an oiread mar d’éirigh leo áit a bhaint amach ag Cluichí Oilimpeacha 2020 tar éis dóibh an ceann is fearr a fháil ar Cheanada ar bhuillí éirice
23 Samhain
B’iontach drámatúil mar a chríochnaigh cluiche ceannais Chraobh Shinsir Pheil na mBan na gClubanna. D’aimsigh Laura Fitzgerald an scór cinniúnach agus gan ach 20 soicind fágtha chun an bua a thabhairt do Mhainistir na Móna Chorcaí agus croíthe imreoirí agus lucht leanúna Chill Choirín/Cluain Bheirn na Gaillimhe a bhriseadh
