COVID-19: 1,773 cás de Covid-19 deimhnithe in Éirinn agus beirt eile básaithe

Dúirt an tAire Sláinte Simon Harris níos túisce inniu gur i dtús na práinne atá an tír seo agus luaigh sé go háirithe an imní atá ann faoi líon na n-othar atá á gcur isteach in aonaid dianchúraim sna hospidéil.

Dúirt an tAire go raibh an acmhainn atá sa tseirbhís sláinte ag feabhsú gach uile lá ach dá mhéad leapacha breise a chuirfí ar fáil nár leor iad  mura gcuirfí srian ar scaipeadh an víris.

Maidir leis na figiúirí is déanaí ón Ronn Sláinte:

• Fir a bhí i gceist le 55% de na cásanna agus mná iad 44%
• Bhí 63 braisle i gceist ar bhain 289 cás leo
• An aois ar an meán a bhí ann i measc na n-othar ná 45 bliain d’aois
• Cuireadh cúram san ospidéal ar 305 duine, nó 26%
• As na daoine sin, cuireadh 39 duine in ICU, nó Aonad Dianchúraim
• Oibrithe sláinte a bhí i gceist le 283 cás, nó 24%
• I mBaile Átha Cliath a bhí an líon is mó cásanna le 559 cás, nó 57%, agus bhí Corcaigh sa dara háit, le 133 cás, nó 11%
• 40 cás a bhí i gcontae na Gaillimhe, 33 a bhí i gcontae Chiarraí, 11 cás bhí i nDún na nGall, 15 cás a bhí i bPort Láirge agus 24 cás a bhí i gcontae na mí
• Scaipeadh sa phobal ba chúis le 49% de chásanna, gartheagmháil le hothar eile ba chúis le 23% agus taisteal thar lear ba chúis le 28%

Dheimhnigh Roinn Sláinte an Tuaiscirt inniu go bhfuil seachtar a raibh Covid-19 orthu anois básaithe.

Magdalene Mitchell, bean 80 bliain d’aois as an Tuaisceart a bhí buailte ag Covid-19, an duine is déanaí le Covid-19 a fuair bás ó thuaidh. Dúirt a gariníon leis an BBC go raibh cion ag cách ar a seanmháthair. Bhí Magdalene Mitchell ina cónaí i dteach altranais agus buaileadh tinn í cúig lá ó shin.

Tá ráite ag an Taoiseach Leo Varadkar go bhfuil an chuma air faoi láthair nach mbeidh 15,000 cás den Covid-19 deimhnithe sa tír seo roimh dheireadh na míosa, rud a bhí á thuar aige roimhe seo.

“Tá beagnach 200 cás nua á n-aimsiú gach lá go fóill agus ní féidir linn a cheapadh go bhfuil an víreas seo á sháinniú againn go dtí go dtosóidh líon na gcásanna nua ag titim gach uile lá,” a dúirt sé.

Dúirt Príomhoifigeach Sláinte na tíre seo, an Dr Tony Holohan go raibh laghdú suntasach tagtha ar an líon teagmhálaithe a bhí ag othair, ó thart ar 20 duine go dtí cúigear, ach dúirt sé go raibh sé i bhfad róluath go fóill aon uchtach a bhaint as an laghdú sin.

Cháin an tAire Sláine Simon Harris an mínós atá ar bun ag daoine áirithe a bheith ag casacht san éadan ar dhaoine agus físeán den bheart a chur amach ar na meáin shóisialta. Dúirt an tAire go ndearna beirt a leithéid leis féin Dé Máirt. “Ní haon chluiche é an nós sin. Is mór an ghráin é,” a dúirt sé agus gheall sé go gcuirfí an dlí i bhfeidhm go géar ar aon duine a dhéanfadh a leithéid.

Gabhadh beirt i mBÁC as a bheith ag casacht san aghaidh ar ghardaí a bhí ag iarraidh scaipeadh a chur ar ghrúpaí móra daoine óga.

Tá na Gardaí ag iarraidh ar dhaoine scéal a thabhairt dóibh sa chás go mbeadh aon duine ag casacht sa mhullach orthu nó ag caitheamh seilí leo chun imeaglú a dhéanamh orthu.

Bhí an Taoiseach agus an tAire Sláinte ag caint ag preasócáid i dTithe an Rialtais tráthnóna mar ar seoladh bileog eolais nua faoin gcoróinvíreas a bheidh á seachadadh chuig gach teaghlach sa tír tríd An Post.

Idir an dá linn, Is mó daoine atá curtha den saol ag Covid-19 sa Spáinn ná sa tSín faoin tráth seo. Ba é inné an lá ba mheasa fós sa Spáinn agus fógraíodh gur bhásaigh 738 duine a raibh an galar tolgtha acu inné. Bhí ardú 20% go dtí  47,610 duine ar an líon a raibh sé deimhnithe go raibh an aicíd tolgtha acu.

Tá 3,434 duine curtha den saol ag an gcoróinvíreas sa Spáinn anois, 149 duine níos mó ná a bhásaigh sa tSín ón ngalar. An Iodáil is measa atá buailte ag an bpaindéim. Tuairiscíodh 683 bás eile sa tír sin tráthnóna, i gcomparáid le 743 bás inné, rud a fhágann gur 7,503 duine le Covid-19 atá básaithe anois sa Iodáil.

Tá an ráig den choróinvíreas ag gabháil in olcas ar fud na Stát Aontaithe agus é scaipthe amach go rábach as na háiteanna ba mheasa a bhí buailte go dtí seo – Nua-Eabhrac, California agus stát Washington. Tá Louisiana agus Iowa fógartha mar láithreacha éigeandála feidearálacha anois.

D’fhógair an Teach Bán agus ceannairí an dá mhórpháirtí sa Seanad go raibh bille éigeandála á rith chun $2 trilliún a chur ar fáil le cuidiú a thabhairt do ghnóthaí, d’oibrithe agus don chóras sláinte agus iad ag iarraidh déileáil le paindéim an choróinvíris.

Tá dianghlasáil curtha i bhfeidhm ar 1.3 billiún duine san India agus an aicíd ag leathadh go tréan ansin.

I dtuairisc ón Imperial College in Ollscoil Londan, maítear go bhfuil chuile chosúlacht ar chúrsaí gur oibrigh an dianghlasáil agus an scoitheadh sóisialta a chuir rialtas na Síne i bhfeidhm go docht in Wuhan agus i gcúigí eile le scaipeadh an choróinvíris a chur faoi chois.

D’fhéadfadh gur bealach a bheadh sa gcur chuige sin leis an saol a chur ina cheart arís, a dúradh.

Dúirt an tOllamh Niall Ferguson, ceann foirne an taighde san ollscoil sin go raibh “údar dóchais éigin” ina gcuid anailíse féin do na tíortha eile ar fad atá ag déileáil leis an bpaindéim faoi láthair. Dúirt sé go bhféadfaí an scoitheadh sóisialta a mhaolú nuair a bheadh líon na gcásanna íslithe.

Ach chaithfí bearta eile a thabhairt isteach ansin ionas nach dtiocfadh borradh an athuair faoi ionfhabhtuithe.

Dúirt Ferguson chomh maith má bhí fúinn an dianghlasaíl a mhaolú go gcaithfí “tástálacha a dhéanamh go gasta agus go seasta agus na polasaithe maidir leis an scoitheadh sóisialta a chur i bhfeidhm go docht ar othair agus ar a lucht teagmhála”.

Tá sé deimhnithe ag teaghlach ríoga Shasana go bhfuil an coróinvíreas tolgtha ag mac na Banríona, Prionsa Séarlas Shasana ach nach bhfuil sé buailte go dona agus go bhfuil sé “i ndea-shláinte’ thairis sin. Níl Séarlas ag coinneáil na leapa agus tá sé ag leanúint air lena chuid oibre, a dúradh. Measann dochtúirí nach mbeadh aon duine in ann an galar a thógáil uaidh roimh an 13 Márta agus an lá roimhe sin a bhí sé i gcuideachta a mháthar go deireanach.