Tá plean cúig chéim foilsithe ag Feidhmeannas Stormont chun na srianta a cuireadh i bhfeidhm le déileáil le Covid-19 a mhaolú.
Athruithe ar na rialacha maidir le haclaíocht a dhéanamh agus cead dul chuig teach an phobail chun paidreacha pearsanta a rá a cheadófar sa gcéad chéim agus sa chéim dheiridh a cheadófar do thithe ósta agus bialanna oscailt arís.
Níl aon chlár ama curtha leis an bplean a léireodh cathain a rachfaí ó chéim amháin go ceann eile, mar atá i bplean an Rialtais ó dheas den teorainn agus i Sasana.
Dúirt an Chéad-Aire Arlene Foster gur ag brath ar an dul chun cinn a dhéanfaí ó thaobh scaipeadh an ghalair a laghdú a thabharfaí faoin gcéad chéim eile.
“Níl an cur chuige seo againne greanta i gcloch agus más féidir linn rudaí a dhéanamh níos fearr nó ar bhealach eile, sin a dhéanfaimid,” a dúirt sí.
“Ní bheidh aon chlár ama ina mháistir orainn agus tá a fhios againn go gcuirfidh sé sin díomá ar dhaoine áirithe – ach níl freagra gach ceiste le fáil inár bplean. Is amhlaidh a léiríonn sé do dhaoine an chaoi a bhféadfadh cúrsaí dul sna seachtainí agus na míonna seo amach romhainn.”
Beidh an scoitheadh sóisialta agus bearta cosanta sláinte eile i bhfeidhm ag gach ceann de na cúig chéim:
Céim 1
- Beidh cead ag siopaí móra atá lasmuigh oscailt (ie ionaid gharraíodóireachta)
- Moltar do dhaoine nach bhfuil in ann oibriú ón mbaile filleadh ar an ionad oibre.
- Féadfaidh grúpaí daoine idir 4-6 nach as an teaghlach céanna iad bualadh le cheile lasmuigh ach cloí leis an scoitheadh sóisialta.
- Beidh cead freastal ar sheirbhísí eaglasta tiomáin isteach agus séipéil a athoscailt do phaidreacha príobháideacha.
- Osclófar spásanna poiblí lasmuigh agus áiseanna spóirt poiblí agus féadfar dul ag siúl, ag rith agus ag rothaíocht.
- Beidh cead roinnt spórt uisce a dhéanamh chomh maith le galf agus leadóg.
- Beidh cead dul chuig pictiúrlann tiomáin isteach.
Céim 2
- Beidh cead ag siopaí nach siopaí bia iad oscailt chomh fada agus go gcoinnítear srian ar an líon daoine a bheidh iontu agus go gcuirfear an scoitheadh fisiciúil i bhfeidhm.
- Cuirfear tús le hobair san ionad oibre de réir a chéile.
- Féadfaidh grúpaí ina mbeidh suas le 10 iontu bualadh le chéile lasmuigh.
- Beidh cead ag foirne spóirt tosú ag traenáil arís ach gan teagmháil le haon duine eile.
Céim 3
- Ceadófar do bhuíonta suas go 30 duine teacht le chéile
- Athosclófar músaeim, dánlanna, leabharlanna agus féadfar tosú ar chleachtaí do cheolchoirmeacha agus d’imeachtaí amharclannaíochta
- Cuirfidh scoileanna leis an soláthar a dhéanann siad ar roinnt daltaí a bhfuil ardtosaíocht acu ar bhonn páirt-aimseartha agus beidh foghlaim ar líne agus sa scoil i gceist
Céim 4
- Cead ar ais ar scoil ag gach dalta ar bhonn páirt-aimseartha
- Réimse níos leithne cruinnithe ceadaithe, ag áireamh seirbhísí eaglasta
- Cead oscailte ag gruagairí, ionaid aclaíochta, ionaid fóillíochta agus siopaí tatú
- Tús leis an spórt iomaíoch ach gan lucht leanúna i láthair ar chor ar bith, nó le srian ar líon na ndaoine sa slua
- Ceolchoirmeacha taobh amuigh ceadaithe ar bhonn teoranta
Céim 5
- Bialanna, caiféanna, tithe tábhairne oscailte, ar bhonn teoranta i dtosach
- Scoileanna oscailte go lánaimseartha
- Cead ag cách filleadh ar an obair ach an obair ón mbaile fós molta más féidir
- Tús le spóirt a mbíonn gartheagmháil i gceist, amhail an rugbaí
- Cead ag lucht féachana freastal ar ócáidí ar bhonn teoranta
- Clubanna oíche oscailte agus ceolchoirmeacha ar siúl arís ar bhonn teoranta
