€4,200+ bailithe ag bean Ghaeltachta a shiúil 340km ar son Women’s Aid

Bhailigh Aoife Ní Chiobháin as na Gorta Dubha i nGaeltacht Chorca Dhuibhne os cionn €4,200 an mhí seo caite don charthanas Women’s Aid. 

Ba í an sprioc a leag Aoife amach roimpi i lár mhí Feabhra ná €500 a bhailiú don eagraíocht a thugann cúnamh agus comhairle do mhná atá thíos leis an bhforéigean baile trí 340km a shiúl in imeacht 17 lá. 

Bhailigh sí os cionn ocht n-oiread na sprice sin agus chuaigh 13 chiliméadar sa bhreis sa dara leath den mhí agus í ag siúl timpeall a limistéir cúig chiliméadar gach uile lá, soineann nó doineann, don charthanas. 

Tá an leathanach iDonate a thosaigh Aoife fós ar oscailt agus is féidir airgead a dheonú do Women’s Aid tríd fós. 

Fágadh Aoife, atá ina cócaire sa bhialann Solas i mbaile an Daingin, gan obair mar gheall ar an dianghlasáil agus thosaigh sí ag siúl timpeall na dúiche leis an am a mheilt. 

Dúirt sí le NÓS gur theastaigh uaithi “rud éigint fiúntach” a dhéanamh agus í díomhaoin agus gur bheartaigh sí na siúlóidí laethúla a bhí sí a dhéanamh go dtí seo a thiontú ina n-imeacht carthanachta. Beagán le cois an 20km sa ló a shiúil sí ón 12 Feabhra go dtí tráthnóna aréir. 

Níos mó