329 cás eile den choróinvíreas a d’fhógair an Roinn Sláinte tráthnóna.
57 othar atá buailte ag an ngalar atá sna hospidéil agus tá 19 acusan in aonad dianchúraim. Sin an líon is lú othar a bhí buailte ag an Covid-19 sna hospidéil ó lár mhí Mheán Fómhair seo caite agus an líon is ísle in aonaid dianchúraim ó dheireadh na míosa céanna.
D’fhógair Roinn Sláinte Thuaisceart Éireann inniu nach raibh aon duine eile básaithe ansin de dheasca an víris le 24 uair an chloig anuas. 143 cás nua a deimhníodh.
16 othar Covid-19 atá in ospidéil an Tuaiscirt agus níl aon duine acusan in aonad dianchúraim.
Bhí an-mhisneach ag Príomhoifigeach Cliniciúil Fheidhmeannacht na Seirbhíse Sláinte inniu agus é ag caint faoin rath atá ar an gclár vacsaínithe.
Dúirt an Dr Colm Henry go raibh “an dochar” bainte as an víreas i measc na ndaoine a raibh snáthaid faighte acu a bhuíochas don líon mór daoine a bhí sásta vacsaín a ghlacadh. Bhí an “dea-thoradh” sin “i bhfad Éireann níos fearr” ná mar a bhíothas ag súil leis ó na trialacha cliniciúla.
Dúirt an Dr Henry go raibh an chuma air go scaoilfeadh an clár vacsaínithe muid “ó ghreim an fhir bháite a bhí ag an víreas seo orainn” agus dúirt “is údar dóchais é sin”.
Dúirt Henry gur ghlac os cionn 90% de na daoine atá os cionn 60 bliain d’aois le vacsaín agus go mbeadh an vacsaín iomlán faighte ag an aoisghrúpa sin faoi lár mhí Iúil ach a laghdófaí an t-achar idir an dá shnáthaid de vacsaín AstraZeneca.
Dúirt an dochtúir go raibh sé ag súil go mbeadh an vacsaín iomlán faighte ag os cionn 30% den daonra faoin 5 Iúil ach go raibh sin ag brath ar an soláthar vacsaíní a thiocfadh chun na tíre.
Bhí an Príomhoifigeach Leighis, an Dr Tony Holohan os comhair Choiste Iompair is Líonraí Cumarsáide an Oireachtais inniu agus ceisteanna á bhfreagairt aige faoi thástálacha antaiginí.
Dúirt an Dr Holohan nach eol dó aon taighde maith in aon áit sa domhan a mholann tástálacha antaiginí a úsáid in earnáil an aerthaistil.
Shéan Holohan go raibh Éire “réchúiseach” ó thaobh tástálacha antaiginí a úsáid ar mhaithe leis an tír a athoscailt.
Agus cúpla staidéar á lua aige, dúirt an Príomhoifigeach Leighis go bhféadfadh roinnt rioscaí a bheith ag baint le mearthástálacha antaiginí a úsáid ar mhaithe le “solas glas” nó cead a thabhairt do dhaoine gníomhaíochtaí áirithe a dhéanamh.
Dúirt an Leas-Phríomhoifigeach Leighis, an Dr Ronan Glynn nach raibh an scéal “chomh simplí le dul chuig an aerfort le cúpla míle tástáil antaiginí agus iad a thabhairt do dhaoine agus fanacht go bhfeicfeá céard a thaispeánfaidís”.
Dúirt an Dr Holohan gur fóinteach an tacaíocht don tástáil PCR na tástálacha antaiginí in áiteanna lena bhfuil ardriosca tolgtha ag baint, amhail monarchana próiseála feola nó i gcásanna a bhfuil an-seans ann go bhfuil an galar tolgtha ag daoine.
Tá an chéad dáileog den vacsaín faighte ag 1,126,677 duine sa Tuaisceart agus tá an dara dáileog faighte ag 772,933.
7,095 duine atá básaithe in Éirinn go dtí seo de dheasca na paindéime, 2,154 duine ó thuaidh den teorainn agus 4,941 duine ó dheas di.
