Iarrthóirí á lorg do scéimeanna oiliúna teilifíse agus raidió
Glacfar le hiarratais go dtí Dé Céadaoin ar dhá scéim oiliúna de chuid an Chiste Craoltóireachta Gaeilge sa Tuaisceart. Tá an scéim á reáchtáil do chainteoirí Gaeilge a bhfuil spéis acu a scileanna léirithe teilifíse agus raidió a fheabhsú.
Cuirfear tús le ‘Scéim na nIontrálaithe Nua i Scileanna Teilifíse’ agus ‘Scéim na Léiritheoirí Raidió faoi Oiliúint’ ar an 6 Meán Fómhair agus beidh siad ar siúl ar feadh bliana. Beidh an daoine a ghlacfaidh páirt sa scéim ag obair le comhlachtaí léirithe teilifíse agus raidió ar fud na Sé Chontae.
“Beidh dhá scéim dhifriúla ar siúl againn, ceann d’oiliúnaithe a bhí againn bunaithe ar shlí bheatha a thosú in earnáil na teilifíse Gaeilge i dTuaisceart Éireann, agus ceann eile don raidió ar a mbeidh na hoiliúnaithe ag obair le Raidió Fáilte.
“Tosóidh an chéad ghrúpa eile oiliúnaithe ar an 6 Meán Fómhair i mbliana. Beidh triúr ag obair in earnáil na teilifíse agus beidh beirt ag obair in earnáil an raidió. Bhí moill ar an dream a bhí le dul faoi oiliúint anuraidh, agus beidh siadsan ag tosú taobh leis na hoiliúnaithe eile i mbliana,” a dúirt Brídín Ní Mhaoldomhnaigh, Oifigeach Chiste Craoltóireachta Gaeilge le Scáileán Thuaisceart Éireann le NÓS.
Beidh deis ag na hoiliúnaithe teilifíse dhá thréimhse a chaitheamh le linn na scéime le dhá chomhlacht léirithe teilifíse in áiteanna éagsúla ar fud an Tuaiscirt, agus beidh na hoibrithe raidió ag obair leis an stáisiún pobail Raidió Fáilte i mBéal Feirste.
Foghlaimeoidh siad scileanna ar nós cén chaoi clár seachtainiúil raidió a léiriú agus a láithriú, cláir chur in eagar, agallamh a dhéanamh le haghaidh clár nuachta, agus taighde a dhéanamh do chláir eile.
Íocfar na hoiliúnaithe de réir an íosráta pá i dTuaisceart Éireann le linn na tréimhse oiliúna, a dúirt Brídín.
Tá Ciste Craoltóireachta Gaeilge ag lorg iarratas anois díreach ó dhaoine a bhfuil Gaeilge líofa acu don dá scéim seo agus beidh sé á nglacadh go dtí an meán lae Dé Céadaoin 21 Iúil. Is féidir tuilleadh eolais a fháil faoin scéim teilifíse anseo agus an scéim raidió anseo.
