Lá Fhéile Bríde – fáilte roimh an earrach!

Gach bliain, ceiliúrtar Lá Fhéile Bríde agus an fhéile réamh-Chríostaí Imbolc ar an chéad lá de mhí Feabhra. I 2023, don chéad uair riamh, beidh lá saoire poiblí againn le haghaidh Lá Fhéile Bríde, ar an Luan is gaire don fhéile – an 6ú Feabhra.

Is léir ón meascán de thraidisiúin atá ceangailte leis an lá go mbaineann cuid acu leis an aimsir réamh-Chríostaí agus cuid eile leis an aimsir Chríostaí, ach díríonn siad araon ar theacht an earraigh* agus ar an bhfás úrnua sa dúlra. Féach thíos ar eolas agus ar earraí (ó ghnóthaí ar ár n-eolaire gnó) a bhaineann leis an lá agus b’fhéidir go gcabhróidís leat an lá a cheiliúradh.

Leabhair ábhartha

Seo rogha de leabhair atá ar fáil faoi Naomh Bríd agus faoi nósanna na tíre go ginearálta. Tá siad uilig ar fáil ó shiopaí leabhair ar fud na tíre.

Ó Cheann Ceann na Bliana: Nósanna an Fhéilire in Éirinn. Tá an leabhar seo ar fáil ó An Ceathrú Póilí.

Fadó Irish Saints Series – Naomh Bríd Chill Dara / St Brigid of Kildare. Is féidir an leabhar seo a fháil ó An Siopa Gaeilge.

Clóca Naomh Bríd. Is leabhar pictiúr le dioscaí é seo, is féidir a cheannach ó An Siopa Leabhar.

Cros Bhríde

Crochtar crosa luachracha fós gach bliain os comhair an dorais agus timpeall an tí chun fáilte a chur roimh Naomh Bríd, agus mar chosaint in aghaidh mí-ádh sa bhliain atá romhainn. Úsáidtear cruth na croise in earraí eile freisin, mar a fheictear thíos.

Is féidir na cártaí nóta thuas a cheannach ó An Siopa Gaeilge. Tá siogairlíní muiníl, fáinní agus fáinní cluaise i gcruth na croise ar fáil ó Brian de Staic sa Daingean. Díolann Siopa an Carn as Doire earraí tarraingteacha le crochadh ar an mballa, cosúil leis an gCrosóg Bhríde agus Beannacht tí seo thuas.

An Dúlra

Seo cúpla feirmeoir ón eolaire gnó ar fiú cuairt a thabhairt orthu ag an am seo den bhliain.

Is féidir cuairt a thabhairt ar fheirm cosúil le An Garraí Glas i nGaillimh nó Garraí Mara i bPort Láirge, agus a dtorthaí feirme a cheannach uathu go díreach ansin, nó ar líne. Tabhair cuairt ar an bhfeirm orgánach Glenmore i bPort Láirge freisin – tá uain ag na caoirigh anois, le feiceáil sna garraithe.

Imeachtaí

Tá Imbolc 2023 ar siúl i mBéal Feirste ó 29 Eanáir go dtí 5 Feabhra 2023, le ceol, taispeántais, siamsaíocht, léachtaí, ranganna, agus níos mó. Is féidir tuilleadh eolais faoin bhféile a fháil anseo ó Cultúrlann McAdam Ó Fiach nó ó Cultúrlann Uí Chanáin.

Tuilleadh eolais

Éist le clár (as Béarla) ón bpodchraoladh Blúiríní Béaloidis chun níos mó eolais a fháil ar na traidisiúin a bhaineann leis an bhféile: Blúiríní Béaloidis 18 – Brigid In Folk Tradition.

Má tá fonn ort Cros Bhríde a chruthú, seo ceardlann ar líne (as Gaeilge) le Niall Mac Eachmharcaigh, aisteoir ó Ros na Rún. Bain triail as!

* Is ea 1 Feabhra tús an earraigh de réir an fhéilire Cheiltigh, cé go bhfuil tuairimí eile ann!