Saol an Oileáin – Oileán Chléire

Is oileán Gaeltachta í Oileán Chléire, atá lonnaithe breis is 12 ciliméadar ó chósta Iarthar Chorcaí. Chomh maith le háilleacht an oileáin, tá oidhreacht shaibhir ann, a théann chomh fada siar le cúpla míle bliain. Ó chaisleán ón 14ú haois, go galláin mheigiliteacha, is léir go raibh, agus go bhfuil fós, cuma shuntasach ar an oileán. De réir roinnt daoine, is áit dhraíochtach í, freisin.

Is mó an nádúr atá le feiceáil ar an oileán, agus fiú ar an mbealach ann. Is minic go bhfeictear gach cineál beatha mhuirí agus an turas ar an mbád farantóireacta faoi bhealach – róin, deilf, faoileáin, líomhain ghréine, míolta móra agus éin san áirimh.

Faoi láthair tá thart ar 120 duine ag cónaí ar an oileán agus is áit bhríomhar, bheomhar í. Bíonn imeachtaí éagsúla ar siúl i rith na bliana agus is suíomh oibre í an t-oileán do chuid mhaith don phobal, leis an scoil náisiúnta, an siopa, an t-ionad campála, na tithe tábhairne, an comharchumann, agus gnóthaí beaga eile ag feidhmiú go rathúil.

Pleanáil Teanga

Ainmníodh Cléire mar cheann de na Limistéir Phleanála Teanga, agus tá plean teanga, Meitheal Chléire, lán seolta agus i bhfeidhm ann. Is é Ruairí Ó Donnabháin an t-oifigeach pleanála teanga ar Cléire agus is mór an obair atá ar siúl aige. Bíonn imeachtaí éagsúla do gach saghas á reáchtáil ag Ruairí go rialta, leo ar fad a bheith go lán Ghaeilge nó dátheangach. Bíonn nithe don teaghlach ar fad ar siúl, le scannáin, ranganna rince, seisiúin cheoil, ceardlanna ealaíona agus  Bród Chléire san áireamh. Is iontach an deis a thugann na himeachtaí seo do dhaonra an oileáin, agus do thurasóirí páirt a ghlacadh in imeachtaí Ghaeilge agus spreagadh a fhail chun na teanga a úsáid agus iad ar Cléire.

Anois, agus íomhá don cheantar agaibh, seo roinnt eolais, ón Eolaire Gnó, ar na gnóthaí éagsúla gur féidir cúpla focal a úsáid iontu ar Ghaeltacht Oileán Chléire.

Bia agus Deoch

Agus tú ag druidim i dtreo na gcuanta ar an mbealach don oileán, tá cúpla foirgneamh móra le feiceáil scaipthe trasna Trá Chiaráin. Ar chlé feictear fógra mór do Chlub Cléire. Tá an club seo i bhfeidhm ag Comharchumann Chléire Teo, agus is maith an chraic a bhíonn ann leis na seisiúin cheol nó imeachtaí áitiúla ar siúl ann. Thíos staighre ón chlub, tá An Siopa Beag agus bialann Seán Rua. Bíonn píotsa álainn le fáil anseo gach Aoine, chomh maith le rogha iontach do nithe a bheadh ag teastáil agus tú ag fanacht ar an oileán.

Suas an cnoc ó Thrá Chiarán, tá Cotter’s Bar. Bíonn an bar oscailte Luan go Domhnach, agus is aoibhinn an radharc atá le feiceáil ón ngairdín agus tú ag suí le ceapaire, pionta nó cupán tae. Anseo, is féidir triail a bhaint as jin a dhéantar sa drioglann ar an oileán, 3 Sq Miles.

Siamsaíocht agus Gniomhaíochtaí

Ar Cléire níl aon ghanntanas rudaí le déanamh agus tú ar chúirt ann. I rith an tsamhraidh, go háirithe, is mór an liosta do ghníomhaíochtaí atá ar fáil.

Agus tú ag sroichint an t-oileán, is minic a bhuailtear le Fin agus Lindy ó Chléire Haven ar an gcé. Ionad campála agus glamping atá lonnaithe 10 nóiméad ón gcuan thuaidh atá ann, le yurt agus teepee, chomh maith le spásanna do dhaoine a bpuball fhéin a thógaint leo. Díreach trasna na chuanta theas ón ionad, tá trá chlochach, agus is ann atá Maratacht, campa samhraidh do dhaoine óga dírithe ar chúrsaí mara, ina dhéantar spóirt uisce chomh maith.

I mbliana beidh tús curtha le féile bliantúil, Féile Lusa Léith Oileán Chléire, féile dhá lá a bheidh ag ceiliúradh an phlanda álainn atá ag fás morthimpeall an oileáin. Beidh ióga, margadh le tairgí éagsúla, ceardlanna ealaíona agus imeachtaí eile, ar siúl, ina bhaintear úsáid as lus liath a d’fhásadh ar Chléire le cúpla bliain anuas. Deis iontach chun tacaíocht a thabhairt do ghnóthaí agus ealaíontóirí áitiúla!

Mar sin, is léir gur áit bheo, gníomhach í Cléire agus gur fiú turas a thógaint ann. Tabhair cuairt ar an oileán, agus bain úsáid as do chúpla focal.