Tá Gradam Uí Shúilleabháin do leabhar Gaeilge na bliana buaite ag Crainn agus Toir le Máirín Uí Chonchúir, saothar a d’fhoilsigh Dingle Publishing.
Saothar saoil leis an luibheolaí agus oide eolaíochta ó Dhún Chaoin i gCorca Dhuibhne é Crainn agus Toir, ina bhfuil cuntas ar os cionn 400 speiceas chomh maith le 2,000 pictiúr.
Na Trí Mhuicín le Áine Ní Ghlinn, scríbhneoir, agus Paddy Donnelly, maisitheoir, a bhuaigh Gradam Réics Carló don leabhar is fearr do dhaoine óga. Futa Fata a d’fhoilsigh.
Athmháthair, aistriúchán le Máire Nic Mhaoláin ar Accabadora, úrscéal Iodáilise le Michela Murgia, a bhuaigh Gradam de Bhaldraithe, an gradam do shaothair aistrithe. Éabhlóid a d’fhoilsigh..
20 leabhar san iomlán bhí ar na gearrliostaí do na gradaim do thithe foilsitheoireachta na Gaeilge.
Fógraíodh na gradaim anocht ag searmannas sa Taibhhearc, Amharclann Náisiúnta na Gaeilge, i nGaillimh.
Duaischiste de €17,000 ar fad atá ann do na trí ghradam.
Príomhfheidhmeannach Fhoras na Gaeilge, Seán Ó Coinn agus Uachtarán an Oireachtais 2024, Pádraig Mac Fhearghusa, a rinne an bronnadh.
Rinne Máirín Nic Dhonnchadha, Ceannasaí an Oireachtais, comhghairdeachas le hÉabhlóid, le Futa Fata agus le Dingle Publishing as a ngradaim.
“Tréaslaím freisin leis na tithe foilsitheoireachta ar fad a bhí ar ghearrliostaí na bliana seo a bhfuil teidil ar scoth an chaighdeáin eisithe acu le bliain anuas,” a dúirt sí.
“Léiriú breá is ea éagsúlacht na seánraí agus na saothar ar an rogha iontach leabhar Gaeilge atá ar fáil ar an margadh anois do léitheoirí den uile aoisghrúpa.”
