Inniu an sprioc ag teaghlaigh ar mhaith leo teach a fháil ar cíos trí ‘Thogra na dTeaghlach Gaeltachta’ i gCorca Dhuibhne.
Beidh ceangal ar na tionóntaí a gheobhaidh na tithe scoláirí Gaeilge a bheidh ag freastal ar Choláistí Chorca Dhuibhne a choinneáil do sheacht gcinn de na cúrsaí Gaeilge a bhíonn ar siúl i gcaitheamh na bliana.
Tá an tógáil le tosú an mhí seo agus beidh na tithe le cur amach ar cíos an bhliain seo chugainn.
Beidh ceithre theach nuathógtha ar fáil faoin togra nua atá á reáchtáil ag Comharchumann Forbartha Chorca Dhuibhne le dul i ngleic le dhá ghéarchéim atá i nGaeltacht Chorca Dhuibhne i láthair na huaire – an ghéarchéim tithíochta agus géarchéim na mban tí.
Caithtear léiriú spéise a chur faoi bhráid Chomharchumann Forbartha Chorca Dhuibhne (CFCD) inniu, an 14 Eanáir.
Tá an fíorghanntanas tithíochta atá sa cheantar ag cur isteach go mór ar dhaoine óga atá ag iarraidh cónaí san áit agus clann a thógáil ann, agus tá an fíorghanntanas ban tí ag cur isteach ar oibríochtaí Choláistí Chorca Dhuibhne.
Tithe cúig sheomra leapa a bheidh sna tithe atá le tógáil ar shuíomh an tseanfhoirgnimh a bhí ag an CFCD i lár Bhaile an Fheirtéaraigh.
Beidh an t-ioncam a thuilleann na teaghlaigh ó na scoláirí Gaeilge seo saor ó cháin mar a bhíonn i gcás an ioncaim a thuilleann na mná tí i gcoláistí samhraidh ar fud na Gaeltachta.
Tá coinníollacha eile ag baint leis an léas a bhronnfar ar na ceithre theaghlach a n-éireoidh leo teach a fháil ar an scéim. Caithfidh an Ghaeilge a bheith mar theanga an tí agus caithfidh an tionónta féin a bheith ina bean/fhear an tí do na scoláirí i rith na gcúrsaí. Is ceithre seachtaine déag a bheidh i gceist, ar a laghad, leis na cúrsaí Gaeilge. Íocfar an t-airgead trí Scéim na bhFoghlaimeoirí Gaeltachta agus beidh ar an tionónta aitheantas a bhaint amach faoin scéim sin. Tabharfaidh CFCD cúnamh leis an bpróiseas sin.
Beidh na tithe ar fáil ar léas ar feadh trí bliana ar a laghad agus deir CFCD go bhféadfaí suas le €50,960 a thuilleamh saor ó cháin gach bliain. Beidh an deis ann níos mó ná seacht gcúrsa a dhéanamh sa bhliain, rud a d’fhágfadh go mbeadh níos mó airgid fós le tuilleamh.
Thug CFCD le fios go bhfuil spéis léirithe ag roinnt teaghlach sa togra cheana féin ach go nglacfar le léirithe spéise ó dhaoine eile suas go dtí an 14 Eanáir. Cuirfear tuilleadh eolais faoi na coinníollacha ar fad ar fáil do dhaoine a léiríonn spéis sa togra.
Tá laghdú suntasach tagtha ar líon na mban tí a chuireann lóistín ar fáil do na coláistí samhraidh Gaeilge le blianta beaga anuas agus roinnt tacaíochtaí breise fógartha ag Airí na Gaeltachta agus iad ag iarraidh tuilleadh teaghlach a mhealladh chun scoláirí a choinneáil.
