Roinn 1 na Sraithe Peile Náisiúnta
Dé Sathairn, 1 Feabhra
Ard Mhacha v Tír Eoghain – Páirc Lúthchleasaíochta (Beo ar RTÉ 2)
Dún na nGall v Áth Cliath – Páirc Mhic Cumhaill (Beo ar TG4)
Dé Domhnaigh, 2 Feabhra
Doire v Ciarraí – Páirc na gCeilt (Beo ar TG4)
Maigh Eo v Gaillimh – Páirc Mhic Éil (Beo ar TG4)
Cuirfidh Dún na nGall agus Jim McGuinness tús lena bhfeachtas sraithe anocht nuair a chuirfidh na Conallaigh fáilte roimh Áth Cliath i mBealach Féich. Cuireadh cluiche Dhún na nGall in aghaidh Chiarraí an tseachtain seo caite ar athlá de thoradh na Stoirme Éowyn agus gan deis againn dá bharr léargas a fháil ar an gcaoi a dtabharfaidh McGuinness faoi rialacha nua na peile.
Is beag seans go scaoilfidh an bainisteoir le gach seift atá sa gcloigeann aige le linn na sraithe agus é ag iarraidh cúpla cleas a choinneáil do Chraobh Uladh agus craobh na hÉireann ina diaidh ach gheofar léargas áirithe ar cá seasann Dún na nGall le linn na sraithe agus radharc chomh maith ar Michael Murphy agus é fillte ar fhoireann an chontae.
Tá obair mhór le déanamh ag Áth Cliath le linn an earraigh agus Dessie Farrell ag iarraidh foireann a chur le chéile gan Brian Fenton, James McCarthy, Jack McCaffrey agus Paul Mannion. Bhí cuma mhaith ar an bhfoireann sa gcéad bhabhta an deireadh seachtaine seo caite agus seacht bpointe aimsithe ag Seán Bugler ina mbua ar Mhaigh Eo i bPáirc an Chrócaigh.
Níos luaithe anocht, beidh seaimpíní na hÉireann ag iarraidh a gcéad chluiche i sraith na bliana seo a bhuachan agus fir Thír Eoghain ag dul soir chuig Páirc Lúthchleasaíochta Ard Mhacha. Chlis ar fhoireann Kieran McGeeney sa dara leath i gcoinne na Gaillimhe Dé Sathairn seo caite agus cuireadh Niall Grimley den pháirc chomh maith, mar bharr ar an donas. Bhí bua cuimsitheach ag Tír Eoghain ar Dhoire an deireadh seachtaine seo caite agus Michael McKernan agus Niall Morgan i measc na n-imreoirí a sheas amach.
Tá cluiche crua eile anois le teacht ag Doire agus Paddy Tally ag cur fáilte roimh Chiarraí, foireann ar chaith sé cúpla bliain mar thraenálaí uirthi faoi Jack O’Connor.
Buntáiste é do Dhoire go bhfuil cluiche ceart imeartha acu leis na rialacha nua, rud nach bhfuil déanta go fóill ag Ciarraí ach beidh an Conchúrach ag súil le tús maith. Tá scata mór ó Chorca Dhuibhne ar an bpainéal aige i mbliana, a bhformhór – seachtar ar fad – ón nDaingean ach beidh muintir Chumann Caide na Gaeltachta ag súil go n-éireoidh go maith le Cathal Ó Beaglaoich agus é tugtha isteach ar an bhfoireann.
Is é cath na gcomharsan i gConnachta cluiche mór an Domhnaigh agus Gaillimh ag taisteal suas an N17 chuig Caisleán an Bharraigh chun aghaidh a thabhairt ar Mhaigh Eo. Thóg sé tamaillín ar fhoireann Phádraic Joyce socrú isteach sa gcluiche i gcoinne Ard Mhacha an tseachtain seo caite ach léirigh na Gaillimhigh a gcumas leis na scóranna nua dhá phointe sa dara leath. Rinne beirt Chois Fharraige, Cillian Ó Curraoin agus Finnian Ó Laoi, go maith le linn an chluiche.
Cé gur chaill siad in aghaidh Átha Cliath, ní raibh aon chaill ar Mhaigh Eo sa gcluiche agus beifear ag súil le toradh maith sa mbaile i bPáirc Mhic Éil. Bíonn muintir an chontae i gcónaí ag iarraidh an ceann is fearr a fháil ar Ghaillimh agus ba cheart go mbeadh coimhlint mhaith eatarthu.
