Tá tacaíocht curtha ar fáil ag Fondúireacht Náisiúnta na hEolaíochta sna Stáit Aontaithe le taighde a dhéanamh ar na cleachtais teanga atá in úsáid i scoileanna dátheangacha na tíre sin.
Deir Alena Esposito, ollamh leis an tsíceolaíocht in Ollscoil Clark in Massachusetts, nach bhfuil “bunús eimpíreach” leis na modhanna teagaisc atá i réim i scoileanna dátheangacha Mheiriceá “cé is moite de chúpla cás-staidéar” agus nach bhfeileann treoirlínte a foilsíodh le deireanas, agus a bunaíodh ar an oideachas dátheangach in Québec, do chás Mheiriceá.
“Feictear dhá mholadh den chuid is mó sna scoileanna poiblí. Deighltear na teangacha go huile is go hiomlán óna chéile nó úsáidtear gach teanga atá ar fáil don dalta. Níl bunús eimpíreach le ceachtar den dá mholadh cé is moite de chúpla cás-staidéar.
“Tá an pobal daltaí atá sa chóras oideachais dátheangach sna Stáit Aontaithe an-difriúil ó na daltaí atáthar a mhúineadh in Québec. Tá muid ag dearadh ár gclár oideachais timpeall ar cheann nach ndearnadh iniúchadh turgnaimh air le feiceáil an oibríonn sé,” a dúirt sí.
Deontas $780,000 (€745,000) atá i gceist.
Déanfaidh lucht an staidéir nua taighde ar scoileanna dátheangacha sna Stáit Aontaithe féin – scoileanna inarb í an Spáinnis an teanga theagaisc den chuid is mó – le fáil amach an bhfuil maitheas ar bith ann do na daltaí sa modh ina n-úsáidtear dhá theanga nó níos mó le linn an lae scoile “lena chinntiú go dtuigeann na daltaí an t-ábhar”.
“Nuair a bhuailtí an t-aláram dóiteáin, chaitheadh muid cumarsáid a dhéanamh leis na daltaí i dteanga a thuig siad agus ardaíonn sé sin an cheist: an buntáiste do na páistí é an t-aon teanga amháin a úsáid i gcónaí, gan an riail sin a lúbadh choíche?” a dúirt Esposito.
Mairfidh an staidéar ceithre bliana agus díreofar ar dhaltaí atá ag fás aníos go dátheangach agus go hilteangach ó chiondargairdín (naíonáin bheaga) go rang a ceathair i scoileanna poiblí in Worcester i lár Massachusetts.
Déanfar taifead físe agus fuaime ar an gcumarsáid a dhéantar idir múinteoirí bunscoile agus a gcuid daltaí. Déanfar measúnú agus anailís ansin ar an gcaoi a ndéanann na múinteoirí cumarsáid leis na daltaí.
Is í Jennifer Coffman, atá lonnaithe in North Carolina State University, an príomhshíceolaí eile a bheidh ag obair ar an staidéar. Is saineolaí í Coffman ar an mbreathnóireacht i seomraí ranga agus múinfidh sí do Esposito agus do na taighdeoirí eile cén chaoi babhtaí cumarsáide 30 soicind idir na daltaí agus na múinteoirí a “chódú” le go mbeifear in ann aanailís a dhéanamh orthu.
“Is í an aidhm atá againn ná fáil amach céard atá múinteoirí a dhéanamh agus an t-eolas sin a úsáid mar bhunchloch don obair eimpíreach ionas go mbunófaí na polasaithe agus na cleachtais ar fhianaise chrua,” a dúirt Esposito.
