Deir an rialtas go mbeidh “tairbhe na hoibre” atá déanta ar na treoirlínte pleanála don Ghaeltacht le feiceáil nuair a fhoilseofar iad, ach ní fios go fóill cén uair a chuirfear os comhair an phobail iad.
Bhí na treoirlínte, a bheartaigh an t-iar-aire tithíochta Darragh O’Brien, le foilsiú ar dtús roimh dheireadh 2021 ach níl aon radharc orthu ó shin agus chuile sprioc a leagadh síos dóibh sáraithe.
Is beag seans go mbeidh na treoirlínte réidh le cur i bhfeidhm roimh dheireadh na bliana seo agus comhairliúchán poiblí le reáchtáil ina dtaobh chomh maith.
Mar fhreagra ar cheist Dála ón Teachta Conor D McGuinness ó Shinn Féin, dúradh go raibh na dréacht-treoirlínte fós “á n-ullmhú” ag an Roinn Tithíochta, Rialtais Áitiúil agus Oidhreachta i gcomhar le Roinn na Gaeltachta agus go ndéanfaí iad a fhoilsiú “chomh luath agus is féidir”.
Ag deireadh 2023, mhaígh an t-aire tithíochta go raibh obair a roinne ar na treoirlínte curtha i gcrích agus go rabhthas ag fanacht ar Roinn na Gaeltachta, ach dúirt an t-iar-aire stáit Patrick O’Donovan a mhalairt go luath ina dhiaidh sin.
Tá na ranna ar aon fhocal faoi fhorbairt na dtreoirlínte ó shin, áfach, agus an dá dhream ag maíomh go bhfuil an obair fós ag dul ar aghaidh.
“Le roinnt blianta anuas tá an-chuid teagmháil leanúnach idir mo Roinn féin agus an Roinn Tithíochta, Rialtais Áitiúil agus Oidhreachta maidir le pleanáil sa Ghaeltacht, nithe a bhaineann le soláthar tithíochta i gceantair Ghaeltachta ina measc,” a dúirt an tAire Stáit, Charlie McConalogue, a bhí ag freagairt thar ceann Roinn na Gaeltachta, sa bhfreagra a cuireadh ar fáil don Teachta Conor D McGuinness, urlabhraí Gaeltachta Shinn Féin.
“Cé nach bhfuil na treoirlínte foilsithe go fóill is léir go bhfuil dul chun cinn déanta ar an gceist seo agus beidh tairbhe na hoibre sin le feiceáil nuair a fhoilsítear na treoirlínte.”
Dúirt McConalogue gur i mí an Mhárta a bhí an cruinniú is déanaí de ghrúpa oibre a bhunaigh na ranna tithíochta agus Gaeltachta chun tabhairt faoi fheabhas a chur ar an phróiseas pleanála sa nGaeltacht.
Ba í an sprioc dheireanach a luadh le foilsiú na dtreoirlínte ná deireadh mhí an Mhárta 2024 ach d’imigh an sprioc sin gan aon sprioc nua a bheith tugtha ina háit. Tá foilsiú na dtreoirlínte luaite sa gclár rialtais a aontaíodh ag tús na bliana seo ach níl aon dáta luaite.
Dúirt an Teachta Conor D McGuinness le gairid go raibh teaghlaigh óga ag imeacht ón nGaeltacht toisc nach raibh siad in ann tithe a fháil ina gceantar dúchais.
