Tá tuismitheoirí agus páistí ó Chois Fharraige le dul i mbun agóide arís an tseachtain seo chugainn agus iad ag iarraidh go ndéanfaí an bóthar sa gceantar níos sábháilte do pháistí scoile.
Ghlac na céadta páirt in agóidí i mBearna, sna Forbacha, ar an Spidéal agus in Indreabhán an mhí seo caite agus tá sé i gceist dul i mbun léirsithe arís agus lucht agóide ag iarraidh go ndéanfaí gníomh chun an bóthar áitiúil, an R336, a dhéanamh níos sábháilte.
I litir a chur Comhlacht Forbartha an Spidéil chuig Comhairle Chontae na Gaillimhe agus chuig Teachtaí Dála agus Comhairleoirí Contae áitiúla le gairid, deirtear go bhfuil géarghá le beartais a dhéanfaidh an trácht a théann thar na scoileanna i gCois Fharraige a mhoilliú.
Maítear sa litir go mbíonn suas le 4,000 feithicil ag taisteal trí shráidbhaile an Spidéil chuile lá, idir charranna, leoraithe agus bhusanna. Deirtear go raibh cúig thimpiste ar an mbóthar gar don scoil le cúpla mí anuas, péire acu thart ar an am a mbeadh páistí ag dul chun na scoile.
Tá iarratas déanta cheana ag an gcomhlacht forbartha ar Chomhairle Chontae na Gaillimhe chun an luasteorainn trí shráidbhaile an Spidéil, mar a bhfuil an bhunscoil áitiúil, a laghdú ó 50km san uair go dtí 30km san uair.
Chomh maith le laghdú ar an luasteorainn, tá iarrtha freisin go gcuirfí trasrianta coisithe agus slite rothair ar fáil chun freastal ar bhunscoileanna Chois Fharraige.
Baileoidh grúpaí lasmuigh de na scoileanna i mBearna, sna Forbacha, ar an Spidéal agus in Indreabhán roimh thús na scoile maidin Dé Luain.
Deir an lucht feachtais go bhfuil an scéal pléite acu le polaiteoirí agus leis an gComhairle Contae le roinnt blianta anuas ach nach bhfuil dul chun cinn sásúil déanta.
Dúirt Catherine Connolly, Teachta Dála Neamhspleách do Ghaillimh Thiar, gur bhuail sí le hoifigigh ó Chomhairle Chontae na Gaillimhe agus leis an Údarás Náisiúnta Iompair le gairid ach gur bheag tuiscint a bhí ann ar thábhacht na ceiste.
“D’éist siad go cúramach ach ní raibh aon tuiscint ann cé chomh práinneach is atá sé rud a dhéanamh,” a dúirt sí.
